१२ वर्षीयामाथि बलात्कार गरेको आरोपमा ५९ वर्षीय पक्राउ

काठमाडौं- रुपन्देही प्रहरीले बालिका बलात्कारको आरोपमा ५९ वर्षीय पुरुषलाई पक्राउ गरेको छ। बुटवल उपमहानगरपालिका बस्ने १२ वर्षीया बालिकालाई जबरजस्ती करणी गरेको अभियोगमा स्थानीय ५९ वर्षीय रुकनाथ ढकाल पक्राउ परेका हुन्। 

रुपन्देही प्रहरीले आइतबार साँझ ढकाललाई पक्राउ गरेको हो। ढकालले बालिकालाई ललाईफकाई तिनाउ खोलामा लगी जबरजस्ती करणी गरेको आरोप लागेको छ। घटनाका सम्बन्धमा थप अनुसन्धान भइरहेको प्रहरीले जानकारी दिएको छ। 

उता तनहुँ प्रहरीले पनि जबरजस्ती करणीको आरोपमा एक जनालाई पक्राउ गरेको छ। २६ वर्षीया महिलालाई जबरजस्ती करणी गरेको अभियोगमा शुक्लागण्डकी नगरपालिका-१० मान्द्रेका ३२ वर्षीय जीवन विक भनिने जुठे विक आइतबार दिउँसो पक्राउ परेका हुन्। 

विकले महिलालाई शुक्लागण्डकी नगरपालिका-१० छाब्दी जंगलको झाडीमा जेठ १ गते साँझ जबरजस्ती करणी गरेको आरोप छ।घटनाका सम्बन्धमा ईलाका प्रहरी कार्यालय बेलचौताराले अनुसन्धान गरिरहेको छ।