भरतपुरमा रुखले च्यापिएर मृत्यु भएका २ जनाको सनाखत

काठमाडौं- भरतपुर महागरपालिकामा शुक्रबार साँझ चलेको हावाहुरीले रुख ढल्दा च्यापिएर तीन जनाको मृत्यु भएको छ। मृत्यु भएकामध्ये दुई जनाको सनाखत भएको छ।

जिल्ला प्रहरीका कार्यालय चितवनका अनुसार शुक्रबार साँझ ७ बजेको समयमा आएको हावाहुरीको कारण ढलेको रुखले चितवन भरतपुर -११ भोजाड जंगल स्थित भित्री सडक खण्डमा पदमपुरबाट भरतपुरतर्फ आउँदै गरेको ना२ह २२४७ नं. को अटोलाई च्यापिउको हो। 

उक्त अटोका चालक भरतपुर ११ लामाटोल बस्‍ने करिब ५०-५१  को प्रदीपकुमार लामा र सोही अटोमा सवार हाल नामथर वतन नखुलेको ५०-५१ वर्षकी महिलाको घट्नास्थलमा नै मृत्यु भएको प्रहरीले जनाएको छ। 

सोही अटोमा सवार २० वर्षीया अबिता गुरुङ र ५० वर्षीया तुलमाया गुरुङ सामान्य घाइते भई पुरानो मेडिकल कलेज भरतपुरमा उपचार भइरहेको छ।

रुख जिल्ला प्रहरी कार्यालय चितवनबाट खटिएको प्रहरी नायब उपरीक्षकको टोली र स्थानीय नागरिकहरुद्वारा घटनास्थलबाट रुख हटाइ मृतकको शवको भरतपुर सरकारी अस्पताल पठाइएको जनाइएको छ। 

त्यसैगरी हावाहुरीको कारण ढलेको रुखले भरतपुर-११ बसेनि चोकमा बिशाल चोकबाट बसेनितर्फ आउदै गरेको ना १ ज ६१४० नं. को म्याजिकलाई किच्दा म्याजिकमा सवार एकजनाको मृत्यु भएको छ। मृत्यु हुनेमा भरतपुर-११ का ४८ वर्षीय लोकनाथ न्यौपानेको मृत्यु भएको हो। मृतकको शव भरतपुर सरकारी अस्पतालमा पठाइएको जनाइएको छ।

सोही हावा हुरीको कारण महानगरको विभिन्‍न स्थानहरुमा रुख तथा बिजुलीको पोल ढलेको र यसको विस्तृत विवरण संकलन भइरहेको जिल्ला प्रहरी कार्यालयले जनाएको छ।