सौन्दर्य प्रतियोगी बलात्कारसम्बन्धी घटनाको छानबिन गर्न एसएसपी नेतृत्वको समिति गठन

काठमाडौं- सौन्दर्य प्रतियोगिताका आयोजकबाट भएको बलात्कारसम्बन्धी घटनाको छानबिन गर्न प्रहरी प्रधान कार्यालयले प्रहरी वरिष्ठ उपरीक्षक (एसएसपी) वसन्त कुँवरको नेतृत्वमा समिति गठन गरेको छ। 

समितिमा एसपी कृष्ण कोइराला, डीएसपी कोपिला चुडाल, हरि बस्नेत र इस्पेक्टर सपना खड्का सदस्य छन्। 

बुधबार साँझ एक युवतीले टिकटकमार्फत आफूमाथि ८ वर्षअघि जबर्जस्ती करणी भएको भन्दै २० वटा भिडियो क्लिप सार्वजनिक गरेपछि यो घटना बाहिरिएको हो। आफू ‘मिस ग्लोबल इन्टरनेसनल नेपाल २०१४’ को ‘फर्स्ट रनर–अप’ हुँदा उक्त सौन्दर्य प्रतियोगिताका आयोजक तथा कन्सल्टेन्सी सञ्चालकले आफूमाथि जबर्जस्ती करणी गरेको ती युवतीको आरोप छ।

यहाँसम्म कि ‘सक्सेस पार्टी’को नाममा आफूलाई एभरेष्ट होटल बोलाएर ‘वेल्कम ड्रिंक’मा नशालु पदार्थ मिसाई बेहोस भएको अवस्थामा करणी गरेको ती युवतीले सार्वजनिक भएको भिडियोमा खुलाएकी छन्। त्यसको ६ महिनासम्म पनि विभिन्न फोटो तथा भिडियो देखाएर धम्कीपूर्ण तरिकाले ब्ल्याकमेल गर्दै लगातार करणी गरेको ती युवतीले दाबी गरेकी छन्। 

काठमाडौं उपत्यका अपराध अनुसन्धान कार्यालयका प्रमुख वसन्तराज कुँवरसँगको प्रश्‍नमा उनले आफूहरु चुप लागेर नबसेको बताए। ‘हामी मौन छैनौं, यो प्रकरणलाई पूरै गम्भिरताका साथ लिइरहेका छौं,’ नेपाल समयसँग उनले भने, ‘हिजोदेखि नै पीडितसँग सम्पर्क गर्न खोजेका थियौं। बल्ल केही बेरअघि उहाँको घरमै सम्पर्क भयो। महिला अधिकृतसहितको हाम्रो टोलीले उहाँलाई काउन्सेलिङ गरेको छ।’ कार्यालयका एसपी कृष्ण कोइरालाको नेतृत्वमा प्रहरी टोली पीडितको घरमा पुगेको थियो।  कुँवरका अनुसार घटनाका आरोपी मनोज पाण्डे पनि प्रहरीको निगरानीमै छन्।