युगान्डाविरुद्ध नेपालको पहिलो जित

काठमाडौं– कीर्तिपुरस्थित त्रिभुवन विश्वविद्यालयमा जारी नेपाल र युगान्डा महिला टिमबीचको पाँच खेलको टी–२० सिरिजअन्तर्गत चौथो खेलमा नेपालले पहिलो जित निकालेको छ।

ओसिलो मैदानका कारण आधा घण्टा पछि सुरु भएको खेलमा नेपालले पहिलो ब्याटिङ गर्दै १५ रनको जित निकालेको हो। दुई ओभर घटाइएको खेलमा नेपालले निर्धारित १८ ओभर खेल्दै सम्पूर्ण विकेट गुमाएर ९७ रन बनाएको थियो।

जवाफमा युगान्डा १८ ओभरमा आठ विकेट गुमाएर ८२ रनमा समेटिएपछि नेपालले १५ रनको जित निकालेको हो। आज नेपालको जितका लागि ओपनिङमा ज्योति पाण्डे र विन्दू रावलले २९ रनको राझेदारी गरे। आउट हुनुअघि विन्दूले १६ रन बनाइन भने ज्योतिले पनि १७ रनको योगदान दिइन्।

त्यस्तै नेपाली टिमको सिनियर खेलाडी सिता रना मगरले ११ र रुविना क्षेत्री एक रनमा आउट भए। नेपालविरुद्ध बलिङमा उत्रिएको युगान्डाका कोन्सी अवेकोले तीन विकेट लिइन् भने सराहले दुई विकेट लिए।

जवाफमा युगान्डाका जानेट एमबाबाजीले २१ रन बनाइन् भने रिता न्यान्गेन्दो र एवेलिन एनिपोले समान १६–१६ रनको योगदान दिए। त्यस्तै, हिरन्मयी रोयले दुई विकेट गिराइन्।

यसअघिका तीन खेलमै हार बेहोरेपछि नेपालले सिरिज गुमाइसकेको छ। यता चौथो खेलमा जित निकालेसँगै नेपालले ३–१ को नतिजा बनाएको छ।