खुकुरी प्रहारबाट तरुणदलका नेता घाइते

दोलखा-नेपाल तरुणदल दोलखा जिल्ला उपाध्यक्ष चित्र तामाङ घाइते भएका छन् । 

तामाङ माथि खुकुरी प्रहार भएको थियो । तामाङ साथी किशोर केसीको निमन्त्रणामा केसीको घरमा पुगेका थिए ।
 
बेलुका सौहार्दपूर्ण वातावरण खानपान सकेर सुतेका तामाङमाथि राति नै खुकुरी प्रहार भएको थियो । 

चित्र तामाङ, किशोर केसी, श्रवण श्रेष्ठ र मिकसन श्रेष्ठ दौतरीका रुपमा एकै ठाउँमा भेला भएर रमाइलो गर्ने क्रममा किशोरको घरमा भेला भएका थिए । किशोर भिमेश्वर नगरपालिकाका मेयर भरत केसीका भतिजा हुन् । 

फरक राजनीतिक आस्थाका कारण उत्पन्न विवाद सांघातीक आक्रमणमा परिणत भएको थियो । 

केसी समूहको आक्रमणमा परेका तामाङको तीघ्रा, घुँडामुनी र कन्चटमा चोट लागेको छ । घाइते तामाङको काठमाडौंस्थित ट्रमा सेन्टरमा उपचार भइरहेको छ । 

घटनाप्रति आपत्ति जनाउँदै नेपाल तरुणदलले आस्थाकै कारणले भएको हमलाको विरोध गरेको छ । 

घाइतेको स्वास्थ्य अवस्थाको जानकारी लिन ट्रमा सेन्टर पुगेका केन्द्रीय उपाध्यक्ष उत्तम चापागाईले यो तरुण दल र नेपाली कांग्रेस माथिको आक्रमण भएको बताउँदै यसरी हुने आक्रमण नरोकिए तरुणदल चुप लागेर नबस्ने चेतावनी दिए । चापागाईले भने, ‘आक्रमण गर्नेको सरकारले कडा कारबाही गरोस् । नेकपाको सर्वसत्ताबादबाट उन्माद नेकपाका कार्यकर्ताले गरेको यस्तो व्यवहारलाई तरुण दलले चुपचाप सहँदैन ।’ 

घटनामा संलग्न तीन जना नेकपासमर्थित कार्यकर्ता हुन् ।