डोटीमा राजधानी माग्दै धनगढीमा प्रर्दशन

धनगढी–प्रदेश ७ संसदले स्थायी राजधानी र नाम प्रस्तावकालागि पहल शुरु गरेसँगै स्थायी राजधानी डोटीमा राख्नुपर्ने माग गर्दै मंगलबार अस्थायी राजधानी धनगढीमा प्रर्दशन गरिएको छ । दिपायल राजधानी संघर्ष समितिको आयोजनामा प्रर्दशन गरिएको हो ।

७ नंम्बर प्रदेशको राजधानी दिपायल कायम गर भन्दै धनगढीको ट्राफिक चौराहबाट शुरु भएको र्‍याली गरी बजार परिक्रमा गरिएको छ । उनीहरुले हरेक हिसाबले राजधानीका लागि दिपायल उपयुक्त भएको भन्दै दिपायल नबनाए कडा आन्दोलन गर्ने चेतावना दिएका छन् । 

यस अघि पनि पटक पटक गरी ६४ दिन सम्म दिपायल राजधानीको माग गर्दै आन्दोलन भएको थियो । संघर्ष समितिले मुख्यमन्त्री, सभामुख र प्रतिपक्ष दलका नेतालाई भेटने कार्यक्रम रहेको आन्दोलनका अगुवा तथा होटल ब्यबसायी संघ डोटीका अध्यक्ष दिपकबहादुर खडकाले जानकारी दिए । 

यता स्थायी राजधानी रहने स्थान र नामबारे सुझाव दिन गठित संसदीय समितिले छलफल जारी राखेको छ । सात दिनको समयसिमा दिई गठन गरिएको बिशेष संसदीय समितिको म्याद सोमबार एक साता थप गरिएको छ । यसैबीच संघर्ष समिति र स्थायी राजधानी र नामाकरणको लागि बिशेष सुझाब समितिबीच सोमबार धनगढीमा छलफल भएको थियो ।