टिपर नियन्त्रणमा लिन ७ राउण्ड अश्रुग्यास प्रहार

मकवानपुर- टिपरको ठक्करबाट एक युवाको मृत्यु भएपछि हेटौंडा उपमहानगरपालिका-१७ गैरीगाउँ तनावग्रस्त भएको छ । प्रहरीले ठक्कर दिने टिपरलाई नियन्त्रणमा लिन खोजेपछि उत्पन्न भएको विवादका कारण तनाव बढेकाे हो । 

कान्तिलोकपथ अवरुद्ध गरि स्थानीयबासीले आइतबार दिउँसो १२ बजेदेखि टिपर नियन्त्रणमा लिएका थिए । बल प्रयोग गरेर प्रहरीले सोमबार टिपर लैजान खोजेपछि स्थानीबासीसँग झडप भएको हो । झडका क्रममा प्रहरीले ७ राउन्ड अश्रुग्यास प्रहार गरेको पत्रकार रुपेश दुलालले जनाएका छन् । 

झडपमा ३ जना प्रहरी समेत घाइते भएको जिल्ला प्रहरी कार्यालय मकवानपुरका प्रमुख एवम् प्रहरी उपरीक्षक बुद्धिराज गुरुङले बताए। उनका अनुसार घाइते प्रहरीको हेटौंडा अस्पतालमा उपचार भइरहेको छ । यता, क्षतिपूर्ती र कारबाहीको माग गर्दै मृतकका आफन्तहरुले शव बुझ्न मानेका छैनन् ।

गैरीगाउँमा ना ७ ख ७३२३ नम्बरको टिप्परले ठक्कर दिँदा स्थानीय २६ वर्षका टंक न्यौपानेको मृत्यु भएको थियो । न्यौपानेको चुरेहिल अस्पतालमा उपचारको क्रममा मृत्यु भएपछि स्थानीय आक्रोशित बनेका हुन् । 

मृतकका आफन्त र गाउँलेहरुले क्षतिपूर्तिको माग गर्दै कान्ति लोकपथ बन्द गरेपछि प्रहरी र स्थानीयबीच झडप भएको थियो । मृतक परिवारले चालकलाई कारबाही र वार्तामार्फत् घटनाको समाधान नभएसम्म शव जिम्मा नलिने बताएका छन् । घटनाको विरोधमा स्थानीयले गैरीगाउँको विभिन्न स्थानमा बाटो बन्द गरेका छन् ।