ठेकेदारको लापारबाहीले निर्माणाधीन सडकमा पर्‍यो भ्वाङ

जनकपुरधाम- जनकपुर उपमहानगरपालिका भित्र निर्माणाधीन सडकमा ठेकेदारको व्यापक लापारबाही देखिएको छ । गुणस्तरहीन सामग्रीको प्रयोग गर्दा निर्माण कार्य पुरा गर्न बाँकी रहेकै सडकमा ठुलो भ्वाङ परेको छ ।

जनकपुर उपमहानगरपालिका वडा नम्बर ४ पिडिया माइस्थान क्षेत्रमा बलराम कन्स्ट्रक्सनले निर्माण गरिरहेको पक्की सडकमा ठुलो भ्वाङ परेको छ । 

आफू मोटरसाइकलले जाँदै गर्दा पक्की सडक अचान भासिएर भ्वाङ परेको स्थानीय विक्की पाठकले बताएका छन् । निर्माण व्यवसायी र सम्बन्धीत कार्यालयले कमिसनको खेलमा गुणस्तरहीन सडक निर्माण गरेको सडक निर्माणको लागि प्रयोग गरिएको अलकतरा हातले उकाल्दै पाठकले बताए ।

एक महिना अगाडी मात्र पक्की गरिएको सडकमा भ्वाङ पर्नु र हातैले अलकतरासमेत निस्कनु सडकको गुणस्तरबारे पुष्टि गरेको त्यहाँको स्थानीयहरुले बताए । बाहिरबाट हेर्दा सडक निर्माण गर्न तोकिएको मापदण्ड पुरा गरेको देखिएपनि सडक पक्की गर्न प्रयोग गरिएको अलकतराको गुणस्तरतर्फ ध्यान नदिइएको स्थानीयहरुको भनाइ छ ।

जनकपुरस्थित मालपोत कार्यालयदेखि राराब क्याम्पससम्म ५ सय २३ मिटर सडक निर्माण गर्न जनकपुरकै बलराम कन्स्ट्रक्सनले जिम्मा पाएको छ । २ करोड ६१ लाख ५४ हजार ५ सय २२ रुपैयाँको लागतमा निर्माण भइरहेको सडकको चौडाई ९ मिटर रहेको छ ।

शहरी डिभिजन कार्यालयले बनाउँदै गरेकोे उक्त सडक खण्ड अहिले निर्माणाधीन अवस्थामा छ । करिब सय मिटर सडक पक्की गर्ने काम अझ बाँकी रहेको छ ।