स्थानीय निर्वाचनका प्रिय-अप्रिय दृश्य

केही ठाउँमा बाहेक नागरिकको मत मतपेटिकामा खसिसकेको अवस्था छ। मतपेटिका गणनास्थलसम्म पुर्‍याउने क्रम जारी छ। निर्वाचन आयोगका अनुसार सम्भव भएसम्म आजै रातिबाट गणना सुरु गर्ने तयारी आयोगको छ।

काठमाडौं र भरतपुर महानगरमा गणना सुरु गर्ने तयारी भइरहेको छ। छिटफुट विवाद र झडपका बीच पनि देशभर उत्साहपूर्ण रूपमा चुनाव सम्पन्न भएको निर्वाचन आयोगले जानकारी दिएको छ। देशका  विभिन्न स्थानमा भएको झडपका कारण चुनावमा तनावसमेत भयो। ५ मतदान केन्द्रमा भने मतदान स्थगित गरिएको छ। जुम्लाको गुठिचौर गाउँपालिका, काभ्रेको पाँचखाल नगरपालिका, सप्तरीको डाक्नेश्वरी नगरपालिका, रौतहटको फतुवा विजयपुर नगरपालिका र कपिलवस्तु महाराजगञ्ज नगरपालिकामा मतदान स्थगित भएको हो।

जनतासामु परीक्षामा होमिएका १ लाख ४५ हजार ११ उम्मेदवारको नतिजा ब्यालेटमा खनिएको छ। जसलाई धेरैमा एक हप्ताभित्र सार्वजनिक गरिसक्ने आयोगले जनाएको छ।

यता राष्ट्रिय मानवअधिकार आयोगले भने स्थानीय चुनाव अपेक्षाकृत शान्तिपूर्ण नभएको निष्कर्ष निकालेको छ। शुक्रबार अपराह्न आयोगले पत्रकार सम्मेलन गरी मानव अधिकारको दृष्टिकोणबाट ७ वटा उच्चस्तरीय अनुगमन टोली र आयोगका कर्मचारी सम्मिलत ४५ वटा टोलीले ७७ जिल्लामै अनुगमन गरेपछि यस्तो निष्कर्ष निकालेको हो।

मतपेटिका तोडफोड तथा आगजनी हुनु, मतदान अधिृकत कुटिनुजस्ता घटनाले राजनीतिक दलले नै थप संयमता अपनाउन आवश्यक रहेको निष्कर्ष आयोगको छ। 

दिनभरजसो नागरिकले उत्साहपूर्वक मत दिन सहभागी भए। अझ मतदानस्थल टाढा भएको हुम्ला, गोर्खालगायतका हिमाली तथा उच्च पहाडी भेगमा अघिल्लै दिन मत खसाल्न हिंडेर आएका थिए। यसले नागरिकमा लोकतन्त्रप्रतिको आस्था र निर्वाचनप्रतिको विश्वास सकारात्मक नै रहेको देखिन्छ। 

मतदातालाई सवारी साधनमा ल्याउन तथा पुर्‍याउन नपाइने निर्वाचन आयोगको निर्देशनका कारण १०० वर्षमाथिका वृद्धवृद्धासमेत हिंडेरै मत हाल्न पुगेका थिए। मोरङको सुन्दरहरैंचा नगरपालिका–७ की ११३ वर्षीया महेश्वरा अधिकारीले मतदान गरेकी छिन् । यस्तै सिन्धुलीकी १०६ वर्षीया कुमारी सुनुवार्नीले समेत मतदान गरिन्।