केनको दोहोरो गोलमा टोटेनहमले अर्सनललाई हरायो

काठमाडौं- ह्यारी केनको दोहोरो गोल सहयोगमा टोटेनहम हट्स्परले आर्सनललाई ३-० ले हराएको छ। टोटेनहमको घरेलु रंगशालामा सम्पन्न भएको खेलमा उसले आर्सनलविरुद्ध सहज जित निकालेको हो।

जितका लागि ह्यारी केनले दुई गोल गरे भने सन ह्युङ मिनले पनि एक गोल थपे। खेलको २२औं मिनेटमा पेनाल्टीमा पाएको अवसरको सदुपयोग गर्दै केनले पहिलो गोल गरेका थिए। त्यस्तै, बेन्टाकुलरको पासको सहयोग लिएर उनले ३६औं मिनेटमा अग्रतालाई दोब्बर बनाए।

त्यस्तै, दोस्रो हाफको पहिलो मिनेटमै गोल गरेर सनले अग्रतालाई ३-० मा पुर्‍याएका थिए। यही अग्रता बचाउँदै टोटेनहमले जित निकालेको हो।

यता  खेलको २६औँ मिनेटमा पहिलो र ३३औँ मिनेटमा दोस्रो पहेँलो कार्ड पाएपछि रोबर्ट सामुएल होल्डिङ मैदानबाट बाहिरिएका थिए। यससँगै आर्सनले १० खेलाडीमा समेटिएको थियो।

यो जितसँगै टोटेनहमले दुई खेल बाँकी रहँदा ६५ अंक बनाएको छ भने चौथो स्थानको आर्सनलेको ६६ अंक छ। यी दुई टिमबीच चौथो स्थानको लागि प्रतिस्पर्धा भइरहेको छ।

‍तालिकाको पहिलो, दोस्रो र तेस्रो स्थानमा भने म्यानचेस्टर सिटी, लिभरपुल र चेल्सी रहेका छन्।