मौन अवधिमा कति नागरिक बाहिरिए उपत्यकाबाट?

काठमाडौं- स्थानीय तह निर्वाचनमा मतदान गर्नका लागि काठमाडौं उपत्यकाबाट मतदाताहरू बाहिरिने क्रम जारी छ। मौन अवधिको समय मात्र एक लाख ४२ हजार ७ सय ४१ जना यात्रुले काठमाडौं उपत्यका छोडेक‍ो ट्राफिक प्रहरीले जनाएको छ।

मौन अवधि सुरूदेखि बिहीबार बिहानसम्म काठमाडौं उपत्यकाबाट १८ हजार सवारी साधनमा उक्त संख्यामा नागरिकहरू बाहिरिएका हुन्।

काठमाडौं उपत्यका ट्राफिक प्रहरी कार्यालयका अनुसार पछिल्लो २४ घण्टामा मात्रै ८३ हजार ६६० जना यात्रुले उपत्यका छोडेका छन्। उक्त अवधिमा ३५ हजार ६५७ जना यात्रु काठमाडौं भित्रिएका छन्। 

यसअघि २७ वैशाखमा ५९ हजार ८१ जना यात्रु उपत्यकाबाट बाहिरिएका थिए। त्यो अवधिमा भने ४२ हजार ८३२ जना काठमाडौं उपत्यका भित्रिएका थिए। २६ वैशाखमा ५० हजार ९३० जना यात्रु बाहिरिएका थिए। त्यस्तै २५ वैशाखमा ५५ हजार ७४६ जना यात्रुले काठमाडौं छोडेका थिए। 

शुक्रबार मतदानको दिन भने पास बाहेकका सवारी साधन सञ्चालनमा रोक लगाइएको छ।