आजको छापाः सहुलियतबिना गरिबको छापदेखि ड्रोन आक्रमणबाट राष्ट्रपति जोगिएको खबरसम्म

काठमाडौं–सोमबार राजधानीबाट प्रकाशित दैनिक समाचारले जाजरकोटको पहिरोमा परी आठ जना मृत्यु तथा एक जना बेपत्ता भएको, ओमप्रकाश मिश्र कायममुकायम प्रधानन्यायाधीश भएकोलगायतका खबरलाई प्राथमिकताका साथ छापेका छन् । 

नयाँ पत्रिका दैनिकले सहुलियतबिना गरिबको छाप शीर्षकमा अपहेलित हुने गरी गरिबको परिचयपत्र बाँडिँदै, तर सहुलियत के दिने टुंगो नै नरहेको खबरलाई मुख्य समाचार बनाएको छ । त्यस्तै संसदलाई बिजनेस अभाव भएको, ओमप्रकाश मिश्र कामु प्रधानन्यायाधीश भएको खबरलाई मुख्य पृष्ठमा छापेको छ । 

कान्तिपुर दैनिकले जाजरकोटको पहिरोमा परी नौ जनाको मृत्यु भएको, ओमप्रकाश मिश्रले सवोच्च सम्हालेको, बेरोजगारलाई निर्वाह भत्ता दिने सरकारको तयारी, भेनेजुएलाका राष्ट्रपति ड्रोन आक्रमणबाट जोगिएको, पर्वतका किसानले घरबाटै गोरुको बिमा गर्न सक्ने व्यवस्था मिलाइएकोलगायतका समाचारलाई प्राथमिकताका साथ छापेको छ । 

नागरिक दैनिकले प्रहरीले नूरप्रसाद र गंगामायाको भेट गराएको, सिक्टा सिँचाई आयोजनामा मूल नहरको संरचना अत्यन्त जीर्ण भएको, जाजरकोटको पहिरोमा सात बालबालिकासहित आठको मृत्यु भएको खबरलाई छापेको छ । 

त्यस्तै आजको कारोबार दैनिकले १९ आयोजनाका एक खर्बको सेयर नागरिकलाई दिइने, छथरमा बसाइँ सर्नेलाई इनामको व्यवस्था गरिएको, निरीक्षकलाई तीन लाखसम्म जरिवानाको अधिकारलगायतका खबरलाई प्राथमिकताका साथ छापेका छन् ।