खोटाङ- खोटाङमा माओवादी केन्द्रका कार्यकर्तामाथि कुटपिट भएको छ। आफ्ना स्थानीय नेता पदम राईमाथि कुटपिट भएको माओवादी केन्द्रले जनाएको छ।
मौन अवधिमा हलेसी तुवाचुङ नगरपालिका–७ महादेवस्थानका कांग्रेस सभापति केदार राई नेतृत्वको समूहले पदममाथि कुटपिट गरेको माओवादीको आरोप छ। पदम बुधबार हलेसीबजारबाट घर गैरीगुठ जानेक्रममा बाटोमा कुटिएका हुन्।
सात जनाको समूहले ‘कता हिँडेको, कहाँ हिँडेको, आफ्नो टोलमा जा’ भन्दै कुटपिट गरेको पदमले बताए। उनलाई हलेसीस्थित एक क्लिनिकमा सामान्य उपचारपछि जिल्ला अस्पताल लगिएको छ।
मौन अवधिमा भोट माग्दै गरेको भेटिएपछि पदममाथि हातपात भएको जानकारी आएको कांग्रेस जिल्ला उपसभापति एवं हलेसी तुवाचुङ नगरपालिकाका मेयर इवन राईले बताए।
जिल्ला प्रहरी कार्यालय खोटाङका डीएसपी उमेश लम्सालले पनि भोट मागेकै विषयमा सामान्य झगडा भएको बताएका छन्।
प्रकाशित: May 12, 2022| 06:25 बिहीबार, वैशाख २९, २०७९
