मतदानका दिन 'असानी'को आंशिक प्रभाव, कहाँ-कहाँ पर्छ पानी?

काठमाडौं- वैशाख ३० गते बिहान ७  बजे सुरु हुने मतदानका दिन देशका केही स्थानमा मेघगर्जन र चट्याङसहित हल्का वर्षा हुने अनुमान गरिएको छ। मौसम पूर्वानुमान महाशाखाले निर्वाचन विशेष पूर्वानुमान सार्वजनिक गर्दै यस्तो जानकारी दिएको हो। 

मतदानका दिन प्रदेश १, मधेश र बागमतीमा सामान्य बदली हुने जानकारी दिएको छ। बाँकी प्रदेशमा भने आंशिक र सामान्य बदली हुने सम्भावनमा छन्। प्रदेश १ बागमती र गण्डकीसहितका केही स्थानमा मात्र हल्का वर्षा हुन सक्ने महाशाखाको अनुमान छ। 

वैशाख ३० गते राति पनि प्रदेश १, बागमती र गण्डकीका केही स्थानमा वर्षा हुने अनुमान गरिएको छ। 

बंगालको खाडीमा वैशाख २५ गते नै 'असानी' विकसित भएकाले मतदानका दिन वर्षा हुन सक्ने अनुमान यसअघि गरिएको थियो। तर असानी भारतको आन्ध्र प्रदेश तटीय क्षेत्र आसपास नै रहेकाले नेपालमा कम प्रभाव पर्ने अनुमान महाशाखाको छ।