काठमाडौं- अखिल नेपाल फुटबल संघ (एन्फा)का पूर्वअध्यक्ष गणेश थापाले आफूमाथि लगाइएका एउटा पनि आरोप पुष्टि गर्न चुनौती दिएका छन्। बुधबार पत्रकार सम्मेलन आयोजना गरी थापाले वर्तमान अध्यक्ष कर्माछिरिङ शेर्पाले लगाएको विभिन्न आरोपको भिडियो क्लिप सावर्जनिक गर्दै यस्तो चुनौती दिएका हुन्।
अध्यक्ष शेर्पाले आफ्नो चरित्रहत्या गरेकाले पछिल्लो ७ वर्ष आफूले मानसिक पीडा भोग्नुपरेको उनको भनाइ छ। शेर्पाको आरोपका कारण आफूले जीवन नै अन्त्य गरौँ कि जस्तो लाग्ने गरेकोसमेत बताएका थिए।
फिफाको प्रतिबन्धमा रहेकै बेला पूर्वअध्यक्ष थापाले पत्रकार सम्मेलनको आयोजना गरेका हुन्। एन्फाको केन्द्रीय निर्वाचन आगामी असार ६ गते हुने तय भएपछि पूर्वअध्यक्ष थापाले पत्रकार सम्मेलन आयोजना गरेकाले अर्थपूर्ण रूपमा हेरिएको छ।
थापाले एफसीका तत्कालीन अध्यक्ष तथा फिफाका अध्यक्षका उम्मेदवार मोहम्मद बिन हमामबाट व्यक्तिगत सहयोग लिएको स्वीकार गरेका थिए। त्यसैकारण आफूले फिफाको प्रतिबन्ध भोगेको उनको भनाइ छ।
गणेश थापाका छोरा गौरव थापाको खातामा १ लाख डलर जम्मा भएको देखिएपछि फिफाले उनीमाथि अनुसन्धान थालेको थियो। पैसा लिएको पुष्टि भएपछि २०७२ साल कात्तिकमा फिफाले थापालाई सबैखाले फुटबल गतिविधिबाट १० वर्षका लागि प्रतिबन्ध लगाएको थियो।
फिफाले थापामाथि २० हजार स्विस फ्र्यांक (करिब २१ लाख रुपैयाँ) जरिवाना पनि गरेको थियो।