पसलबाट सुन चोरेको आरोपमा तीन भारतीय नागरिक पक्राउ

बुटवल- बुटवलको सुनचाँदी पसलबाट चोरी गरेको आरोपमा तीन जना पक्राउ परेका छन्। बुटवल अमरपथमा गत वैसाख १३ गते राति एक सुनचाँदी पसल चोरीको आरोपमा पक्राउ पर्नेमा भारत जौहरी मोहल्ला चौँक लखनउ चौक उत्तर प्रदेश बस्ने वर्ष ३६ को मोहसिन अब्दुल्ला खान, भारत साई एन्क्लेव गोमती बिहार कोलोनी लखनउ उत्तर प्रदेश बस्ने वर्ष २५ को मोहद जीशान खान र भारत तकिया पेपर मिल कालोनी सी ब्लक -२ निशातगँज महानगर लखनउ उत्तर प्रदेश बस्ने वर्ष २२ को मोहम्मद सारीक पक्राउ परेका हुन्। 

ईलाका प्रहरी कार्यालय बुटवल र ईलाका प्रहरी कार्यालय लुम्बिनीबाट खटिएको टोलिले खोजतलासको क्रममा बैसाख २६ गते साँझ लुम्बिनी साँस्कृतिक न.पा. वडा नं.-४ महुवारी स्थित खुनगाई कालीदह सडक खण्डमा चेकजाँच गर्ने क्रममा भारतीय नम्बर प्लेट युपि३२एलडब्लु ३१५१ वागोनर गाडी चेकजाँच गर्दा उक्त गाडीमा सवार उनीहरु पक्राउ परेका हुन्। 

बुटवल ६ बि.पी. चोकस्थित दिल बहादुर सुनारले संचालन गरेको गुल्मेली मजुवा सुनचाँदी पसलबाट चार करोड बढीको सुन र गहना चोरी भएको थियो। 

उनीहरुको साथबाट १०/१० ग्रामको सुनको बिस्कुट थान-२, २० ग्रामको सुनको बिस्कुट थान-१, सुनको गरगहना डल्लो बनाएको सुनको ढिक्का थान-१, सुनको पैसाको सिक्का आकारको गोलो थान-१, मोबाईल थान-३, नगद भा.रु. १०० को नोट ६० वटा, आधार कार्ड, एटीएम कार्ड बरामद गरिएको जिल्ला प्रहरी कार्यालय रुपन्देहीका प्रमुख रविन्द्र रेग्मीले जानकारी दिए। उनीहरुलाई प्रहरी हिरासतमा राखी निजहरु उपर चोरी मुद्दामा थप अनुसन्धान भई रहेको रेग्मीले बताए।