आईपीएलमा मुम्बई इन्डियन्सलाई कोलकत्ताले हरायो

काठमाडौं- इन्डियन प्रिमियर लिग (आईपीएल) मा सोमबार राति सम्पन्न भएको खेलमा कोलकत्ता नाइट राइडर्सले मुम्बई इन्डियन्सलाई ५२ रनले हराएको छ। डी वाई पाटिल क्रिकेट रंगशालामा सम्पन्न खेलमा पहिले ब्याटिङ गरेको कोलकत्ताले ५२ रनको जित निकालेको हो।

टस हारेर ब्याटिङको अवसर पाएको कोलकत्ताले पुरा ओभर खेल्दै ९ विकेट गुमाएर १६५ रन बनाएको थियो। जवाफमा १५ बल बाँकी रहँदै सम्पूर्ण विकेट गुमाएको मुम्बई ११३ रनमा समेटिएपछि कोलकत्ताले जित निकालेको हो।

कोलकत्ताको जितमा वेंकटेस अयरले र नितिश रानाले समान ४३–४३ रन बनाएका थिए। त्यस्तै अजिंक्य रहाणेले २५ र रिंकु सिंहले २३ रनको योगदान दिए। यता मुम्बईका लागि जसप्रित बुमराहले पाँच विकेट गिराउँदा कुमार कार्तिकेयरले दुई विकेटको योगदान दिए।

त्यस्तै, जवाफमा मुम्बईका इशान किसनले ५१ रन बनाए भने अन्य खेलाडीले सम्झनलायका प्रदर्शन नै गरेनन्। बरु बलिङमा कोलकत्ताका पट कमिन्स, आन्द्रे रसेल, टिम साउथी र वरुण चक्रवर्तिले क्रमशः ३, २, १ र १ विकेट गिराए।

यो जितसँगै कोलकत्ता आईपीएल तालिकाको सातौं स्थानमा छ भने मुम्बई तालिकाको पुछारमा कायम छ।

आईपीएलमा आज लखनौ सुपर जायन्ट्सले गुजरात टाइटन्सको सामना गर्दैछ। यी दुवै क्लबले यो वर्षबाट आईपीएलमा डेब्यु गरेका हुन्। यी दुई क्लब आईपीइएल तालिकाको शीर्ष र दोस्रो स्थानमा छन्।