माओवादी-एमाले कार्यकर्ताबीच झडप हुँदा हराएकी महिलाको शव फेला

रुकुम पूर्व- गत वैशाख १९ गतेदेखि हराएकी एक महिलाको शव फेला परेको छ। पुथाउत्तरगंगा गाउँपालिका–११, की अन्दाजी ३५ वर्षीया दुची भनिने जुनमाया बुढा नौ दिनदेखि हराइरहेकी थिइन्।

जिल्ला प्रहरी कार्यालयका प्रहरी नायव उपरीक्षक प्रकाश डाँगीले १९ गतेदेखि हराएकी बुढाको शव भेटिएको बताए। १९ गते सोही वडामा माओवादी केन्द्र र एमालेका कार्यकर्ताबीच झडप भएको थियो।

झडपसँगै हराएकी बुढाको शव गाउँकै जंगलमा भेटिएको प्रहरीले जनाएको छ। स्थानीय स्तरमा विवाद भएको र सोही क्रममा हराएको भन्ने बुझिएको प्रहरीले जनाएको छ।

घटनाबारे अनुसन्धान भइरहेको प्रहरीको भनाइ छ। शव पोष्टमार्टमका लागि जिल्ला अस्पतालमा राखिएको छ।

नेकपा एमालेले भने माओवादीका कार्यकर्ताले उनको हत्या गरेको दाबी गर्दै आएको छ। जिल्ला कमिटी अध्यक्ष टोपबहादुर ओलीले विज्ञप्ति जारी गर्दै माओवादी कार्यकर्ताले बलात्कार गरी ती महिलाको हत्या गरेको आरोप लगाएका छन्। उनले दोषि पत्ता लगाएर कारबाहीको माग समेत गरेका छन्।