एमालेसँग मत माग्ने आधार छैन : महत

बुटवल- नेपाली कांग्रेसका प्रवक्ता प्रकाश शरण महतले एमालेसँग मत माग्ने कुनै आधार नभएको बताएका छन्। उनले एमाले अध्यक्ष ओलीले मिठा गफ मात्रै गरेको र मनोरञ्जन दिलाएको बताए। 

पाँच दलीय गठबन्धनले शनिबार बुटवलमा गरेको आमसभालाई सम्बोधन गर्दै महतले यस्तो बताएका हुन्।  'आफ्नो दुई तिहाइको सरकार ढाल्ने अनि गफ गरेर हुन्छ,' उनले भने, 'गफ गर्ने र मनोरञ्जन गर्छौं भनेर भोट माग्ने।'

राजनीतिमा इमान, समर्पण र दुरदृष्टि चाहिने भन्दै ओली नेतृत्वको सरकार असफल भएको उनले बताए। उनले गठबन्धनको सरकार आएपछि देशमा कुशासन हटेको बताए।

देशमा कोभिडले ठप्प पार्दा ओलीले सुनदेखि ओम्नी काण्ड घटाएको उनको आरोप छ। नेपाली कांग्रेस काम गर्ने पार्टी भएको भन्दै अहिलेको गठबन्धनले कुराको अन्त्य गर्ने बताए। 

उनले पाँच दलीय गठबन्धनले देशमा स्थिरता र लोकतन्त्र जोगाउने दाबी गरे। उनले ओली नेतृत्वको सरकारले देशलाई शरणमय बनाएको आरोप लगाउँदै देउवा नेतृत्वको सरकार बनेपछि देशमा अनुदानको ओइरो लागेको बताए।