नेपालसँग सस्तैमा समेटियो जिम्बाबे

काठमाडौं- कीर्तिपुरस्थित त्रिभुवन विश्वविद्यालयको क्रिकेट मैदानमा जारी दुई देशिय शृंखलाअन्तर्गत दोस्रो खेलमा जिम्बावे ए टिम नेपाली टिमविरुद्ध सस्तैमा समेटिएको छ।

टस हारेर पहिले ब्याटिङ गरेको जिम्बाबेले ३१ ओभर  पाँच बल खेल्दै सम्पूर्ण विकेट गुमाएर ८७ रन समेटिएको हो।

जिम्बावेविरुद्ध पहिलो बलमै विकेट लिएको नेपाली अलराउन्डर करण केसीले तीन विकेट गिराए। त्यस्तै, नेपाली फास्ट बलर सोमपाल कामीले पनि सात  ओभर बलिङ गर्दै तीन विकेट गिराए।

कसिलो बलिङ गरेको नेपालका कप्तान सन्दीप लामिछानेले पनि दुई विकेट गिराए भने सागर ढकालले एक विकेट लिएका थिए।

खेलमा जिम्बाबेका इनोसेन्ट किया पहिलो बलमै आउट भए। त्यसपछि ताडिबान्सी मरुमानी, रोय किया, टोनी मुन्योङा र क्लिव मन्डने र लुके जंवे र ब्रान्डन मभुताले दोहोरो अंकमा रन बनाउनै सकेनन्।

जिम्बाबेका लागि जोनाथन क्याम्प्बेलले सर्वाधिक २७ रन बनाए भने ब्राड एभन्सले २० रनको योगदान दिए। सेफस झुवाओले पनि १० रन बनाएका थिए।