एनभीए लिग भलिबल : महिलामा एपीएफ र पुरुषतर्फ आर्मीको जित

काठमाडौं- छैटौं संस्करणको एनभीए महिला तथा पुरुष भलिबल क्लब लिगमा शुक्रबार विभागीय टिम एपीएफले महिलातर्फ जित निकालेको छ।

शुक्रबार बिहान त्रिपुरेश्वरस्थिति राखेपको कभर्डहलमा सम्पन्‍न भएको खेलमा एपीएपले न्यु डायमन्ड स्पोट्स क्लबलाई हराएर लिगमा ९ अंक जोडेको हो।

चौथो खेलबाट तेस्रो जित निकाल्दा ९ अंक जोड्ने क्रममा एपीएफले न्यु डायमन्डलाई ३-० को सोझो सेटमा हराएको हो। एपीएफले लिगमा शुक्रबार २५–१९, २५–१० र २५–९ को जित निकालेको हो।

यता न्यु डायमन्डले भने लिगका सबै खेलमा एक अंक मात्र जोड्न सफल भयो। शुक्रबार नै भएको अर्को खेलमा पुरुषतर्फको विभागीय क्लब त्रिभुवन आर्मीले पुलिस क्बलाई ३-१ को सेटमा हराएको छ। लिगको पाँचौ खेलमा आर्मीले पुलिसविरुद्ध जित निकाल्दै १५ अंकसमेत बटुलेको छ।

सबै खेलमा पुरा अंक बटुलेको आर्मी अहिले १५ अंकका साथ लिगको शीर्षस्थानमा रहेको छ। आर्मीले आज पुलिसलाई १७–२५, २५–२०, ३०–२८ र २५–२३ को जित निकालेको हो।

त्यस्तै आजकै अर्को खेलमा दोस्रो स्थानको टिप टप हेल्प नेपालले गल्कोट स्पोट्स क्लबमाथि २५–१५, २५–२३ र २५–२१ को जित निकालेको हो। यो जितसँगै हेल्प नेपालले १४ अंक बनाएको हो।

यता लिगमा पुलिसले पाँच खेलबाट ९ अंक जोडेको छ। गल्कोटको दुई तथा ढोरपाटनको एक अंक रहेको छ। प्रतियोगितामा पुरुषतर्फ ७ टिम सहभागी बनेका छन् भने महिलातर्फ पाँच क्लबको सहभागीता रहेको छ। यो लिगको विजेताले छ लाख पुरस्कार पाउने छ भने उपविजेताले तीन लाख पुरस्कार पाउने छ। त्यस्तै तेस्रो र चौथो हुनेले एक लाख ५० हजार  र ७५ हजार पुरस्कार पाउने छ।

अब शनिबार महिलातर्फ एक खेल हुनेछ भने पूरुषतर्फ तीन खेल हुनेछन्। महिलातर्फ ९ अंक जोडेको पुलिसले ६ अंक भएको आर्मीसँग प्रतिस्पर्धा गर्नेछ। त्यस्तै, पुरुषतर्फ गल्कोटले गण्डकीको सामना गर्नेछ भने पुलिस क्लबले एपीएफको सामना गर्नेछ। त्यस्तै, आर्मीले हेल्प नेपालसँग खेल्नेछ।