काठमाडौं- जिम्बावे ‘ए’ विरुद्धको पहिलो एकदिवसीय खेलमा नेपालले पहिले ब्याटिङ गर्ने भएको छ। जिम्बावे ‘ए’ ले टस जितेर फिल्डिङ रोज्दै नेपाललाई पहिले ब्याटिङको निम्तो दिएको हो।
एकदिवसीय खेलका लागि नेपाली टिममा केही परिवर्तन समेत गरिएको छ। कप्तान सन्दिप लामिछानेसँगै स्पीनरद्वय सागर ढकाल र सुशन भारी पहिलो रोजाइमा खेल्दैछन्। यस्तै फास्ट बलरमा सोमपाल कामी र करण केसी नै निरन्तर छन्। अलराउण्डरको रुपमा आदिल अन्सारी छन्।
ओपनिङ आसिफ शेख र कुशल भुर्तेलले गर्नेछन् भने आरिफ शेख, दीपेन्द्र सिंह ऐरी र रोहित पौडेल मिडल अर्डरमा छन्। विनोद भण्डारी, देव खनाल, विक्रम सोब र किशोर महतो बेन्चमा छन्। सुनिल धमला भने टिम लिस्टमा पनि अटाएका छैनन्।
तीन खेलको टी-२० शृंखलापछि यी दुई टोली एकदिवसीय खेल खेल्न लागेका हुन्। तीन खेलको टी-२० शृंखलामा दुवैले एक-एक खेल जित्दै शृंखला बराबरी गरेका थिए। एक खेल भने वर्षाका कारण रद्द भएको थियो।