काठमाडौं- एनभिए लिग अन्तर्गत त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा बिहीबार भएको खेलमा पुलिसले लगातार तेस्रो जित दर्ता गरेको छ। प्रतिभा माली बेगरको न्यू डायमण्ड स्पोर्ट्स क्लबलाई ३-० को सोझो सेटमा हराउँदै पुलिसले तेस्रो जित दर्ता गरेको हो। एकपक्षीय बनेको खेलमा पुलिसले डायमन्डलाई २५–११, २५–१७ र २५–१५ ले सहजै हराउन सफल भएको हो।
लिगकै अर्को खेलमा अर्को विभागीय टोली एपीएफले एभरेष्ट भलिबल क्लबलाई २५–१३, २५–१०, १९–२५ र २५–१९ ले पराजित गर्दै दोस्रो जित निकालेको छ। यो जितसँगै एपीएफले तीन खेलबाट ६ अंक प्राप्त गरेको छ। एभरेस्टको ३ खेलबाट २ अंक छ।
गल्कोटले ढोरपाटन स्पोर्टस् क्लबलाई ३-२ सेटमा पराजित गर्यो। गल्कोटले ढोरपाटनलाई २३–२५, २५–१५, १८–२५, २५–२२ र १५–८ ले पराजित गरेको हो। गल्कोटको यो जितसँगै २ अंक प्राप्त गरेको छ। ढोरपाटनको १ अंक छ।
अर्को खेलमा टिपटप हेल्प नेपाल स्पोर्टस् क्लबले पुलिस क्लबमाथि ३-० को जित निकालेको छ। हेल्प नेपालले २५–२३, २५–२३ र २५–२० को जित निकाल्दै आफ्नो खातामा थप ३ अंक जोड्यो। यस संगै हेल्प नेपालको ११ अंक भएको छ।