जनकपुरमा चुनाव सकिएको १० महिनापछि पुनः मतगणना!

जनकपुरधाम- स्थानीय तह निर्वाचन सकिएको १० महिनापछि जनकपुर उपमहानगरपालिका वडा नम्बर १९ वेंगाशिवपुरको मतगणना पुनः हुने भएको छ । उच्च अदालत जनकपुरले आदेश जारी गरेपछि यो वडाको मतगणना पुनः हुने भएको हो । 

उच्च अदालतका न्यायधीश डा.रविशर्मा अर्यालयको एकल इजलासले भदौ २६ गते विहान ११ बजे मतगणना दोहर्‍याउन आदेश दिएको छ । मतगणनामा धाँधली भएको भन्दै एमालेका वडा अध्यक्षका प्रत्याशी विनोदकुमार साहले जिल्ला निर्वाचन कार्यालयलाई विपक्षी बनाउँदै उच्च अदालत जनकपुरमा रिट दिएका थिए । रिट उपर सुनवाइ गर्दै उच्च अदालतले जिल्ला निर्वाचन कार्यालयको नाममा यस्तो आदेश जारी गरेको हो ।

स्थानीय तहको निर्वाचनमा वडा नम्बर १९ को वडा अध्यक्षमा संघीय समाजवादी फोरम नेपालका उम्मेदवार जगदीश यादव सात सय ८७ मत ल्याएर विजयी भएका थिए । उनका निकटतम प्रतिद्धन्द्धी एमाले उम्मेदवार ६ मतले पराजित भएका थिए । आफूलाई पराजित गर्न मतगणना अधिकारीहरुले सात वटा मतपत्र लुकाएको साहको दावी छ ।