गोरखा जीप दुर्घटनामा ज्यान गुमाउने तीनै जनाको परिचय खुल्यो

गोरखा- गोरखाको सिरानचोक गाउँपालिका ४ आरुबोटेमा सोमबार बेलुकी भएको जीप दुर्घटनामा ज्यान गुमाएका तीनै जनाको परिचय खुलेको छ।

ज्यान गुमाउनेमा बारपाक सुलिकोट गाउँपालिका ५ का ५० वर्षीय देवीप्रसाद पोखरेल, कावासोती नगरपालिका १४ का ८० वर्षीय उत्तरकुमार सिग्देल र काठमाडौं महानगरपालिका १६ बनस्थली बस्ने ४५ वर्षीय पदम न्यौपाने रहेका छन्।

जिल्ला प्रहरी कार्यालय गोरखाका अनुसार चितवनबाट जन्ती बोकेर आएको बा१४च ७८१ नम्बरको जीप गोरखाबाट चितवन फर्कंने क्रममा सोमबार बेलुकी सिरानचोक गाउँपालिका ४ आरुबोटेको फिरफिरे भिरबाट तल खसेको थियो। 

तीन जना यात्रु चढिसकेपछि अन्य दुई जनालाई चढाउनका लागि सहयोग गर्न जीप चालक सिट बाहिर ओर्लिएका बेला ओरालोमा रोकिराखेको जीप पछाडि सर्दै सडकबाट तल खसेको प्रहरीले जनाएको छ।

जीप चालक भरतपुर महानगरपालिका १८ धर्मपुरका घनश्याम लामिछानेलाई प्रहरीले पक्राउ गरेको छ।