निर्वाचन आचारसंहिता संविधानको प्रावधान विपरीत छ : विश्वप्रकाश शर्मा

काठमाडौं- सत्तारुढ  नेपाली कांग्रेसका महामन्त्री विश्वप्रकाश शर्माले निर्वाचन आचार संहिता संविधानले दिएको अभिव्यक्ति स्वतन्त्रता विपरीत भएको बताएका छन्। शुक्रबार पार्टी केन्द्रिय कार्यालय सानेपामा पार्टी निकट नेपाल साँस्कृतिक संघद्वारा निर्माण गरिएको चुनावी गीत सार्वजनिक कार्यक्रममा उनले निर्वाचन आचारसंहिताका विषय असन्तुष्टि राखेका हुन्। 

उनले उम्मेदवार र पार्टीको आधिकारिक फेसबुक पेजबाट मात्रै चुनावको प्रचार गर्न मिल्ने तर अन्य नागरिकले नमिल्ने आचारसंहिताको मर्म भए त्यसलाई सुधार गर्नुपर्ने बताए। महामन्त्री शर्माले निर्वाचनमा फजुल खर्च नगर्न र स्वस्थ प्रतिस्पर्धामा भाग लिन पनि पार्टीका स्थानीय तहका उम्मेदवारहरुलाई सचेत गराएका थिए।  

‘अहिले बनेको आचारसंहितामा केही प्रश्न उठाउनुपर्ने विषय पनि छन्। सामाजिक सञ्जालबाट प्रचार गर्न नपाउने हो भने, उम्मेदवारले मात्रै गर्न पाउने भन्ने हो भने, पार्टीले मात्रै आफ्नो आधिकारिक फेसबुक पेजबाट प्रचार गर्ने भन्ने हो भने त्यो अभिव्यक्ति स्वतन्त्रतामा बन्देज लगाएको हुन्छ,' शर्माले थपे, 'त्यसैले मैले भनेको छु–आचारसंहिताले संविधानले दिएको अभिव्यक्ति स्वतन्त्रता बन्देज गर्न खोजेको छ भने त्यसलाई करेक्सन गरौं । र, स्वस्थ ढंगले निर्वाचनमा प्रतिस्पर्धा गरौं । निर्वाचनमा फजुल खर्च नगरौं।’

निर्वाचनमा बेला झुटा आश्वासन बाँडेर नहिँडन पनि पार्टीका उम्मेदवारहरुसँग उनको आग्रह छ। झुटा सपना निर्वाचनको बेला देखाउने तर पछि त्यसलाई पूरा गर्न नसकिए जनतामा निराशा छाउने उनको भनाइ थियो।