'मी टू'बारे प्रश्न सोधेपछि रिसले चुर भए स्थापित, प्रश्नकर्तालाई फर्काए 'थुतुनो ठिक नभएको' जवाफ

काठमाडौं– काठमाडौं महानगरपालिकाको मेयरका उम्मेदवार केशव स्थापित ‘मी टू’का विषयमा प्रश्न सामना गर्नु परेपिछि आक्रोशित बनेका छन्। नेसनल कलेजले आयोजना गरेको ‘स्थानीय चुनाव : युवाको आशा र जिज्ञासा’ कार्यक्रममा विद्यार्थीहरुले स्थापितलाई लागेको ‘मी टू’ आरोपबारे प्रश्न गरेपछि स्थापित आक्रोशित बनेका हुन्। 

'मी टू'को प्रश्न सोध्नेबित्तिकै उनी कुर्सीबाट उठेर। प्रश्नकर्तामाथि खनिए। ‘मलाई लागेको आरोप लगाइयो। आरोप लगाउनेसँग प्रमाण हुनु पर्छ,’ विद्यार्थीप्रति जंगिदै स्थापितले भने, 'यु आर नाइस लेडी तर तपाईंको थुतुनो ठिक छैन।’

यति भनेपछि स्थापितका प्रतिस्पर्धीले नै आफ्नो स्थानमा बस्नका लागि तानेका थिए। विवेकशील साझाकी मेयर उम्मेदवार समीक्षा बाँस्कोटाले उनलाई तानेर बसाएकी थिइन्। तर स्थापित सेलाइसकेकै थिएनन्। केहीछिन बसेका उनी फेरि जंगिए। रिसले चुर भएका स्थापितले भने, ‘केशव स्थापित रिसको भाँडा हो। नरिसाउनू भन्न पाइन्छ?’

प्रश्नकर्ता विद्यार्थी भावना राउतले भने एमालेले महिलालाई आपत्तिजनक शब्द प्रयोग गरी आवेग प्रदर्शन गर्ने स्थापितलाई मेयर बनाएकाले अब  महिला अधिकारका लागि सडकमा  नआउन सुझाव दिएकी छन्। 

'एमालेका महिला सांसद अधिकारकर्मीहरु, बिन्ति! अब महिला हकहित का लागि भन्दै सडक नआउनु होला किनकि तपाईको पार्टीभित्रको मौनताले दुर्घटना निम्ताएको छ,' उनले फेसबुकमा  स्टाटस लेखेकी छन्। 

यसअघि काठमाडौं महानगरपालिकाको मेयरमा स्थापित भएका बेला महानगरकै पूर्वकर्मचारी रश्मिला महर्जन र पत्रकार उज्ज्वला महर्जनमाथि यौन दुर्व्यवहार गरेको आरोप लगाएका थिए। सोही विषयमा भावनाले प्रश्न स्थापितलाई प्रष्ट पार्न भनेकी थिइन्।