अचानक किन रोकियो सुनुवाइ समितिको बैठक ?

काठमाडाैं- प्रस्तावित प्रधानन्यायाधीश दीपकराज जोशीको विषय निर्णय गर्न बसेको संसदीय सुनुवाइ विशेष समितिको बैठक अचानक स्थगित भएको छ । बिहान १० बजेदेखि बसेको बैठकमा सर्वसहमतिबाट निर्णय गर्ने प्रयास भएपनि त्यो सम्भावना नभएपछि बैठक छोटो समयका लागि स्थगित भएको हो । 

स्रोतका अनुसार शीर्ष तहमा परामर्श गरेर टुङ्गोमा पुग्ने तयारीका लागि बैठक स्थगित गरिएको हो । अहिले समितिमा रहेका सदस्यहरु आफ्ना दलका शीर्ष नेताहरुसंग अनौपचारिक छलफलमा जुटेका छन् । अब बस्ने बैठकमा निर्णयका लागि बहुमतिय प्रकृयामा जाने तयारी छ । यसअघि पाँच पटक संसदीय सुनुवाइ समितिको बैठक बसेपनि जोशीको विषयमा निर्णय गर्न सकेको छैन् । 

सत्तापक्ष दल नेकपा प्रस्तावित प्रधानन्यायाधीश जोशीको नाम अनुमोदन नगर्ने पक्षमा छ भने विपक्षी दल कांग्रेस उनको नाम अनुमोदन हुनु पर्ने अडानमा छ । समितिबाट जोशीको नाम स्विकृत वा अस्विकृत गर्न दुई तिहाइ मत आवाश्यक पर्छ ।

सत्तापक्ष दल नेकपा र फोरमको मत जोड्दा दुई तिहाई सजिलै पुग्ने देखिन्छ । समितिमा सत्तापक्ष दल नेकपाका ९ र फोरमका १ सदस्य छन् भने विपक्षी दल कांग्रेसका ४ र राजपाका १ सदस्य छन् । दुई तिहाई पुर्याउन सत्ता पक्षलाई कठिन हुने निष्कर्श सहित कांग्रेसले भोटिङमा जान सत्तापक्ष दललाई दवाव दिएको हो । 

जेठ २९ गते बसेको संवैधानिक परिषदको बैठकले सर्वोच्च अदालतका कामु प्रधानन्यायाधीशको जिम्मेवारीमा समेत रहेका जोशीको नाम प्रधानन्यायाधीशका लागि सिफारिस गरेको थियो । उनको सुनुवाई सम्पन्न भएपनि प्रमाणपत्रलगायतका विवादमा मुछिएसंगै दलहरु विभाजित भएपछि उनको मुद्दा पेचिलो बनेको छ ।