संसदीय सुनुवाइ विशेष समितिको बैठक शुरु

काठमाडौं-प्रस्तावित प्रधानन्यायाधीश दीपकराज जोशीको विषयमा निर्णय लिन बोलाइएको संसदीय विशेष सुनुवाइ समितिको बैठक शुरु भएको छ । 

आठ दिनअघि सुनवाइ गरेपनि जोशीको विषयमा निर्णय गर्न नसकेको समितिले शुक्रबारको बैठकलाई निर्णायक बनाउने तयारी गरेको सुनुवाइ समितिका सदस्यहरुले बताएका छन् । 

तर, सत्तापक्षका तर्फका समिति सदस्यले प्रधानन्यायाधीशमा सिफारिस जोशीको शैक्षिक प्रमाणपत्र र फैसलाहरु विवादीत भएको भन्दै उनको नाम अस्वीकृत गर्नुपर्ने अडानमा र प्रतिपक्षी दलतर्फका सदस्य जोशीको नाम अनुमोदन गर्नुपर्ने बताएपछि समितिले निर्णय लिन सकेको छैन । 

आजको बैठकबाट भने निर्णय लिइ छाड्ने सत्तापक्ष दलका सदस्यहरुको तयारी छ । सकेसम्म सर्वसहमतीबाट नभए बहुमतबाट भएपनि जोशीको बारेमा निर्णय लिने सत्तापक्षीय दल नेकपाका एक सदस्यले जानकारी दिए । कांग्रेसले बहुमतलाई बन्धन बनाउन खोजेको भन्दै आज कांग्रेसले सहमति नदिए पनि निर्णय हुनसक्छ ती सदस्यले भने । 

समितिबाट जोशीको नाम अस्विकृत गर्न दुई तिहाइ मत आवाश्यक पर्छ । सत्तापक्ष दल नेकपा र फोरमको मत जोड्दा दुई तिहाई सजिलै पुग्ने देखिन्छ । समितिमा सत्तापक्ष दल नेकपाका ९ र फोरमका १ सदस्य छन् भने विपक्षी दल कांग्रेसका ४ र राजपाका १ सदस्य छन् । 

जेठ २९ गते बसेको संवैधानिक परिषदको बैठकले सर्वोच्च अदालतका कामु प्रधानन्यायाधीशको जिम्मेवारीमा समेत रहेका जोशीको नाम प्रधानन्यायाधीशका लागि सिफारिस गरेको थियो । उनको सुनुवाई सम्पन्न भएपनि प्रमाणपत्रलगायतका विवादमा मुछिएसंगै दलहरु विभाजित भएपछि उनको मुद्दा पेचिलो बनेको छ । 

यसैबीच आजै नेपाली कांग्रेस संसदीय दलको बैठक बस्दैछ । कांग्रेस संसदीय दलको बैठकबाट जोशीका विषयमा केही धारणा बनाउने विषयमा छलफल हुनेछ ।