काठमाडौं- आसन्न स्थानीय तहको निर्वाचनका लागि बागलुङमा सत्तारुढ दलले भागबन्डा टुंग्याएको छ। गठबन्धनले पालिकामा दिने उम्मेदवारीको टुंगो लगाएका हो।
सहमतिअनुसार नेपाली कांग्रेसले ६, नेकपा माओवादी केन्द्रले दुई र राष्ट्रिय जनमोर्चाले दुई पालिका प्रमुखमा उम्मेदवारी दिन पाउने भएका छन्।
कांग्रेसले बागलुङ नगरपालिका र गलकोट नगरपालिकामा प्रमुख तथा काठेखोला गाउँपालिका, बडिगाड गाउँपालिका, निसीखोला गाउँपालिका र तमानखोला गाउँपालिकाको अध्यक्षमा साझा उम्मेदवारी दिने भएको छ।
माओवादी केन्द्रले ताराखोला गाउँपालिका र ढोरपाटन नगरपालिकाको प्रमुखमा उम्मेदवारी दिने सहमति भएको छ। त्यसैगरी राष्ट्रिय जनमोर्चाले जैमिनी नगरपालिकाको प्रमुख र बरेङ गाउँपालिकाको अध्यक्षमा उम्मेदवारी दिने छ।
बागलुङ नगरपालिका र गलकोट नगरपालिकामा माओवादी केन्द्रले उपप्रमुखमा उम्मेदवारी दिने छ। निसीखोला गाउँपालिकाको उपाध्यक्ष पनि माओवादी केन्द्रको भागमा परेको छ। राष्ट्रिय जनमोर्चाले काठेखोला गाउँपालिका र बडिगाड गाउँपालिकाको उपाध्यक्ष पाएको छ। नेकपा एकीकृत समाजवादीले तमानखोला गाउँपालिकाको उपप्रमुखमा उम्मेदवारी दिने भएको छ।
माओवादी केन्द्र र राष्ट्रिय जनमोर्चाले प्रमुख पाएका सबै पालिकामा नेपाली कांग्रेसले उपप्रमुख पाउने गरी सहमति भएको छ।
प्रकाशित: Apr 25, 2022| 11:18 सोमबार, वैशाख १२, २०७९
