नवौं राष्ट्रिय एस्ट्रोनोमी ओलम्पियाडको आवेदन खुला

काठमाडौं- यो वर्षको लागि सञ्‍चालन गरिने नवौं राष्ट्रिय एस्ट्रोनोमी ओलम्पियाडको आवेदन आइतबार खुलेको छ। नेपाल एस्ट्रोनोमिकल सोसाइटी(नासो)ले आयोजना गर्ने ओलम्यिाडको आवेदन खुलेको आइतबार प्रेस विज्ञप्तिमार्फत् जानकारी दिइएको छ।

‘विद्यालय तहका विद्यार्थीहरुको प्रतिभा पहिचान तथा प्रवर्द्धनका लागि सन् २०१४ देखि सञ्‍चालित कार्यक्रममा यस वर्ष कक्षा ८ देखि १२ सम्मका विद्यार्थीले आवेदन दिन सक्नेछन्,’ विज्ञप्तिमा लेखिएको छ, ‘विद्यार्थीको तहगत सिकाइलाई ध्यान दिँदै राष्ट्रिय एस्ट्रोनोमी ओलम्पियाड जुनियर र सिनियर गरी दुई विधामा आयोजना गरिनेछ।’

ओलम्पियाडमा कक्षा ८ देखि कक्षा १० सम्मका विद्यार्थीले जुनियरमा आवेदन दिन सक्नेछन् भने ११ देखि १२ का विद्यार्थीले सिनियरमा आवेदन दिन सक्ने आयोजकले बताएको छ। ओलम्पियाडको पहिलो चरणको छनोट परिक्षा प्रादेशिक चरणको रुपमा बैशाख २४ देखि हुनेछ। 

उक्त दिन शनिबार बिहान दिउँसो १२ बजेदेखि २ बजेसम्म इटहरी, जनकपुर, काठमाडौं, पोखरा, बुटवल, सुर्खेत तथा धनगढीमा आयोजना गरिने आयोजकले बताएको छ। ओलम्पियाडमा सहभागी हुन चहाने विद्यार्थीहरूले आवेदन फारम संबन्धित प्रदेशका संयोजकलाई बुझाउन आयोजकले अनुरोध गरेको छ।

प्रदेश चरणमा गरेको प्रदर्शनका आधारमा दोस्रो चरण (राष्ट्रिय) मा संबन्धित प्रदेशका विद्यार्थीहरुलाई सामेल गराइनेछ। यसरी दोस्रो चरणमा उत्कृष्ट प्रदर्शन गर्ने विद्यार्थीहरुलाई तेस्रो तथा अन्तिम चरणमा सहभागी गराइने आयोजले बताएको छ।

तेस्रो चरणको मूल्याङ्कन मार्फत् सहभागी विद्यार्थीहरूलाई यो वर्ष संचालन हुने अन्तर्राष्ट्रिय एस्ट्रोनोमी तथा एस्ट्रोफ़िसिक्स ओलम्पियाडहरुको लागि सिफारिस गरिनेछ।