सामुदायिक वनको जग्गामा ठडियो एनजिओको भवन

धनगढी- कैलालीको धनगढीस्थित एक सामुदायिक वन उपभोक्ता समूहको जग्गामा एनजिओको भवन निर्माण गरिएको छ। 

धनगढी उपमहानगरपालिका वडा नम्बर १३ स्थित कैलाली सामुदायिक वन क्षेत्रमा दृष्टि फाउन्डेसनको भवन निर्माण गरिएको हो। 

सामुदायिक वन क्षेत्रमा सस्थाको भवन निर्माणपछि उपभोक्ता आक्रोशित बनेका छन्। यसबारे सरोकारवाला निकाय (कैलाली सामुदायिक वन उपभोक्ता समूह, जिल्ला वन कार्यालय, कैलाली तथा इलाका वन कार्यालय)ले चासो नदिएको उनीहरुको भनाइ छ। 

उपभोक्ता समूहका एक पदाधिकारी पनि यसलाई स्वीकार्छन्। सामुदायिक वन क्षेत्रको सरक्षणमा आफूले बैठकमा पटकपटक कुरा उठाए पनि समितिका अन्य पदाधिकारीले चासो नदिएको ती पदाधिकारीको भनाइ छ। 

‘मैले उपभोक्ता समूहको बैठकमा यसबारे (सामुदायिक वन सरक्षण) पटकपटक कुरा उठाए। वन समूहका अध्यक्षसग पनि आग्रह गरे,’ ती पदाधिकारीले भने, ‘तर, यसबारे बेवास्ता गरियो।’ 

सामुदायिक वन उपभोक्ता समूहका अध्यक्षसग यसबारे टेलिफोनमार्फत बुझ्न खोज्दा सम्पर्क हुन सकेन। 

इलाका वन कार्यालय, धनगढीका वन अधिकृत जिसन कार्की भने आफू कार्यालयमा सरुवा भएर आउनुअघि नै भवन निर्माण भइसकेकाले भवन हटाउन समस्या भएको बताउछन्। ‘म कार्यालयमा सरुवा भएर आउनुअघि नै भवन बनिसकेको थियो। अब बनिसकेको भवन कसरी हटाउने?’ उनले जवाफ दिए। 

उनले सामुदायिक वन क्षेत्रमा थप भवन बन्न लागेको जानकारी पाए रोक्ने बताए।