काठमाडौं- बुधबार राति गोली लागेर गम्भीर घाइते भएकी कपिलवस्तुस्थित शमशेर दल गण गोरुसिङ्गे ब्यारेककी महिला सैनिक जवानको बिहीबार बिहान ज्यान गएको छ।
ब्यारेकमा कार्यरत सिपाही झापाको गौरहदह नगरपालिका १ की २४ वर्षीया कोपिला राजवंशीको मृत्यु भएको हो।
उनको लुम्बिनी प्रादेशिक अस्पतालमा उपचारका क्रममा मृत्यु भएको कपिलवस्तुका प्रहरी प्रमुख एसपी दानबहादुर कार्कीले जानकारी दिए। राति ब्यारेक भित्रको पोस्टमा डिउटीमा रहेको बेला राइफल (एम १६) आफैले आफै तिर फायर गरी आत्महत्याको प्रयास गरेको पाइएको प्रहरीले जनाएको छ।
गोली लागेर उनी गम्भीर घाइते भएकी थिइन्। थप उपचारका लागि काठमाडौं लैजाने तयारी गरिए पनि अवस्था गम्भीर भएपछि त्यही उपचार गरिएको थियो।