पलविरुद्ध बलात्कार आरोप लगाएकी पीडितले नवलपुरमा पनि फेरिन् बयान

काठमाडौं- पल शाहले आफूमाथि पटकपटक बलात्कार आरोप लगाएकी नाबालिग गायिकाले नवलपरासी पूर्वमा पनि बयान फेरेकी छन्। बुधबार नवलपुर अदालतमा बकपत्रका क्रममा उनले आफूमाथि पलले करणी नै नगरेको दाबी गर्दै आफैले लगाएको आरोपविरुद्ध बकपत्र गरेकी हुन्। 

यसअघि पनि नाबालिगले आफूमाथि पलले बलात्कार नगरेको दाबी गर्दै तनहुँ जिल्ला अदालतमा बकपत्र गराएकी थिइन्।  २०७७ चैत ७ गते गैँडाकोटको एक रिसोर्टमा ती गायिकामाथि शाहले जबरजस्ती करणी गरेको भन्दै गत फागुन १५ गते जाहेरी दर्ता भएको थियो। 

‘पलले मलाई करणी गरेका होइनन्। उनी त मेरा अविभावक हुन्,' बुधबार अदालतमा बकपत्रका क्रममा पीडितले भनेकी छन्, ‘सबै झुटो हो। हाम्रोबीचमा नराम्रो सम्बन्ध छैन।’

नाबालिगको बकपत्रका बेला पल शाहलाई पनि अदालत उपस्थित गराइएको थियो। बाँकी साक्षी र जाहेरवालाको बयान भोलिबाट हुने अदालत स्रोतले जानकारी दिएको छ। 

पीडित र पीडित परिवारले बकपत्र फेर्न थालेपछि उनीहरू 'होस्टाइल' भएको आशंका गरिएको छ। 

आरोपित पल पुर्पक्षका लागि थुनामा छन्।