मोटरसाइकलमा सल बेरिएर युवतीको मृत्यु

विराटनगर- मोरङको ग्रामथान-७ मा एक युवतीको सडकमा गुडिरहेको मोटरसाइकलमा सल बेरिएर मृत्यु भएको छ। को ३८ प २२०३ नम्बरको मोटरसाइकलको पछाडि सवार सुनसरीको इटहरी उपमहानगरपालिका–८ की करिव २१ वर्षीया रेश्मा नेपालीको मृत्यु भएको प्रहरीले जनाएको छ।

प्रहरीका अनुसार नेपालीले लगाएको लेहेङ्गाको सल मोटरसाइकलको चक्कामा बेरिएर मंगलबार साँझ ६:५० बजेतिर दुर्घटना भएको हो। 

दुर्घटनामा परेर गम्भीर घाइते भएकी उनलाई उपचारका लागि विराटनगरको विराट नर्सिङ होम पुर्याउनसाथ चिकित्सकले मृत घोषित गरेका हुन्। उक्त मोटरसाइकलका चालक ग्रामथान–७ घर भएका प्रहरी जवान ३० वर्षीय निरजकुमार चौधरी हुन्।

चौधरीले टिपरको ठक्करका कारण दुर्घटना भएको दाबी गरेपछि प्रदेश १–०२–००१ ख ८१०३ नम्बरको टिपर र चालक मोरङको बूढीगङ्गा गाउँपालिका–७ का ३४ वर्षीय हर्कबहादुर तामाङलाई पनि प्रहरीले नियन्त्रणमा लिएको छ।