कौसी थिएटरमा आजदेखि 'उलार' मञ्चन

काठमाडौं– लेखक नयनराज पाण्डेको उपन्यास ‘उलार’मा आधारित नाटक सुरू भएको छ। टेकुस्थित कौसी थिएटरमा मञ्चन सुरु भएको उलारमा रंगकर्मी चे शंकरको परिकल्पना तथा निर्देशन रहेको छ। 

गार्डेन थिएटर र कथा घेरासँगको सहकार्यमा मञ्चन हुने नाटकमा सरिता गिरी, सवीर चरौटे, अरूण शर्मा, सञ्जय गुप्ता, शेखर चापागाईं लगायत कलाकारहरुको मुख्य भूमिका रहेको छ। दर्जन बढी नाटक निर्देशन गरेका चे शंकरको निर्देशनमा यसअघि ‘सेम टाइम नेक्स इयर’, ‘लुक व्याक इन एंगर’, ‘तिर्खा’, ‘ऊ मरेकी छैन’, ‘कोही किन बर्बाद होस्’, ‘मिस्टर फक्स एण्ड स्कुल ब्वाय’, लगायत नाटक मञ्चन भइसकेका छन्। 

२५ वर्ष अगाडि प्रकाशित उलार नेपालगञ्जको परिवेशमा बुनिएको उपन्यास हो। लघु आकारमा रहेको यो उपन्यास सीमान्त तहका जनताहरको संघर्षको कथा भन्छ। लेखक नयनराज पाण्डेको चर्चित उपन्यास मध्ये एक हो उलार। यसले उठाएका राजनीतिक, सामाजिक र आर्थिक मुद्दा वर्तमान नेपाली समाजमा अद्यापि सान्दर्भिक रहेको निर्देशक चे शंकरको भनाइ छ।

पाठकले निकै रुचाएको उलारका पात्र र कथा अहिले पनि लोकप्रिय छन्। यस कथालाई नाटकका रुपमा दर्शकमाझ ल्याउने काम चुनौतीपूर्ण भए पनि आफू उत्साहित रहेको चेले बताए। उनले नाटक मञ्चनका लागि एक महिना रिहर्सल गरेको पनि बताए। नाटक आज ६ गतेदेखि वैशाख १८ गतेसम्म मञ्चन हुनेछ।