सिन्धुली- आइतबार बिहानैदेखि अवरुद्ध बनेपा–सिन्धुली–बर्दिबास (वीपी) राजमार्ग सञ्चालनमा आएको छ।
ठेकेदार, मृतक बालकका आफन्त र प्रहरी प्रशासनबीचको सहमतिपछि राजमार्ग सञ्चालनमा आएको हो। दुई दिनपछि आफन्तले बालकको शव बुझेर पोष्टमार्टमका लागि सिन्धुली अस्पताल ल्याइएको छ।
कमलामाई नगरपालिका ४ र ६ जोड्ने ग्वाङ खोलामा पक्की पुल निर्माणका लागि खनिएको खाल्डोमा जमेको पानीमा डुब्दा फिक्कल गाउँपालिका १ का प्रकाश भुजेलका १२ वर्षीय छोरा सिरास भुजेलको मृत्यु भएको थियो।
उक्त घटनालाई लिएर पीडित पक्षले ठेकेदारलाई कारबाही र क्षतपूर्तिको माग गर्दै कमलामाई नगरपालिका ४ ढुङ्ग्रेवासमा राजमार्ग अवरुद्ध पारेका थिए।
प्रकाशित: Apr 17, 2022| 13:05 आइतबार, वैशाख ४, २०७९
