प्रथम टी-२० मेयर कप क्रिकेटको उपाधि राजविराजले जित्यो

विराटनगर- विराटनगरमा सम्पन्न प्रथम टी-२० मेयर कप क्रिकेट प्रतियोगिताको उपाधि राजविराज नगरपालिकाले जितेको छ। 

विराटनगर-१९ स्थित वैजनाथपुर क्रिकेट मैदानमा शनिबार सम्पन्न फाइनल खेलमा जनकपुर उपमहानगरपालिकालाई १० रनले पराजित गर्दै राजविराजले उपाधि उचालेको हो। 

उपाधि भिडन्तमा टस जितेर ब्याटिङ गरेको राजविराजले निर्धारित २० ओभरमा ८ विकेट गुमाउँदै ९७ रनको स्कोर खडा गरेको थियो। राजविराजका लागि विवेक यादव २१ र पूर्वअन्तर्राष्ट्रिय खेलाडी महबुब आलम १४ रन बनाउन सफल भए। जनकपुरका लागि ‘सटिक बलिङ’ गर्ने क्रममा साइमन रोयले ४ ओभरमा ९ रन खर्चिँदै ३ विकेट लिएका थिए। 

जनकपुर ६ विकेटमा ८७ रनमा अल आउट भयो। जनकपुरका लागि विशाल सुसबैनले ३० बलमा सर्वाधिक ३३ रन बनाए। जनकपुरलाई अन्तिम ओभरसम्म रन रोक्दै पराजयतर्फ धकेल्नका लागि विकास दास र विवेक यादवले सटिक बलिङ गरेका थिए। 

राजविराजले उपाधिसँगै १ लाख रुपैयाँ नगद पुरस्कार पाएको छ। उपविजेतामा खुम्चिएको जनकपुरले ५१ हजार रुपैयाँमै चित्त बुझाउनु पर्‍यो। प्रतियोगितामा राजविराजका विकास दास उत्कृष्ट ब्याट्सम्यान, राजविराजकै अनिल यादव उत्कृष्ट बलर र जनकपुरका हरिशंकर साह प्लेयर अफ दी सिरिज घोषित भए।

प्रतियोगितामा ५८ रन बनाएका हरिशंकरले कूल ७ विकेट लिएका थिए। विराटनगर महानगरपालिकाको आयोजना र होराइजन क्रिकेट क्लबको संयोजनमा  गत २२ गतेदेखि प्रतियोगिता सुरु भएको थियो। 

प्रतियोगितामा प्रदेश १ का विराटनगर महानगरपालिका, इनरुवा नगरपालिका, मेची नगरपालिका तथा मधेस प्रदेशका वीरगन्ज महानगरपालिका, जनकपुर उपमहानगरपालिका र राजविराज नगरपालिका गरेर ६ वटा टिमले सहभागिता जनाएका थिए।