कोभिड महामारीले लैंगिक असमानता बढ्यो : युनिसेफ

काठमाडौं– युनिसेफकी कार्यकारी निर्देशक क्याथरिन रसेलले कोभिड महामारीका कारण लैंगिक असमानता बढेको बताएकी छिन्।

अन्तर्राष्ट्रिय महिला दिवसको अवसरमा मंगलबार शुभकामना वक्तव्य प्रकाशित गर्दै रसेलले एक करोड दश लाखभन्दा बढी बालिका महामारीपछि कहिल्यै विद्यालयमा फर्कन नसक्ने अवस्था आएको समेत संकेत गरिन्।

‘कोभिड–१९ ले बालिकाहरूको जीवनमा नराम्रो असर गरिरहेको छ। बन्द विद्यालय, आर्थिक तनाव तथा सेवामा अवरोधहरूले उनीहरूको स्वास्थ्य र भविष्यलाई जोखिममा पारेको छ,’ उनले भनेकी छिन्, ‘अर्को दशकमा थप एक करोड बालिकाहरू बालविवाहको जोखिममा रहनेछन्।’

साथै, संयुक्त राष्ट्रसंघीय जनसंख्या कोष (युनएफपिए)ले महिलाको यौनांग विच्छेदका २० लाख थप घटनाहरू हुन सक्ने बताएको छ। यसको अर्थ बालिकाहरूको स्वास्थ्य र शिक्षामा पुनः लगानी गर्नु र उनीहरूको पहुँचमा तत्काल सुधार गर्नुपर्ने रहेको समेत युनिसेफले जनाएको छ।