स्याङ्जाका दुई पालिकाका किसानलाई ३५ हजार माछाका भुरा वितरण

स्याङ्जा- मत्स्य विकास केन्द्र मिर्मीले स्याङ्जाका २ पालिकाका किसानलाई ३५ हजार माछाका भुरा वितरण गरेको छ। स्याङ्जाको वालिङ र पुतलीबजार नगरपालिकाका किसानलाई माछाका भुरा वितरण गरिएको हो। 

किसानको मागका आधारमा माछाका भुरा वितरण गरिएको केन्द्रका प्रमुख रविनसन अधिकारीले जानकारी दिए। गण्डकी प्रदेशका ११ वटै जिल्ला कार्यक्षेत्र रहेको केन्द्रले पहिलो चरणमा स्याङ्जामा भुरा वितरण गरेको हो। उनले भने, ‘केन्द्रको स्वीकृत वार्षिक कार्यक्रमअन्तर्गत भुरा उपलब्ध गराएका हौं।’ 

वालिङ नगरपालिकामा १९ माछापालक फार्मका किसानलाई १६ हजार माछाका भुरा वितरण गरिएको पशु शाखा वालिङका प्रमुख डा. वसन्त अधिकारीले बताए। पोखरीको क्षमता हेरेर विभिन्न जातका माछाका भुरा उपलब्ध गराएको उनको भनाइ छ। ‘यसले व्यावसायिक उत्पादनमा जोड दिँदै माछामा आत्मनिर्भर बनाउने अभियानमा सहयोग पुग्ने छ,’ उनले भने।

केन्द्रले बिग हेड कार्प, सिल्भर कार्प, रोहु, नैनी जातका माछाका भुरा वितरण गरेको हो। माछापालन पछिल्लो समय व्यावसायिकरूपमा अगाडि बढेको वालिङ नगर उपप्रमुख कल्पना तिवारीले बताइन्। ‘माछापालनतर्फ किसानको आकर्षण बढ्दै गएको छ, वालिङमा आवश्यक पर्ने माछा यहीँ उत्पादन गर्न सकिन्छ,’ उनले भनिन्।

व्यावसायिक उत्पादनका लागि नगरपालिकाले स्थानीय किसानलाई अनुदान तथा प्राविधिक सहयोग उपलब्ध गराउनुका साथै उत्पादित वस्तुको बजारीकरणका लागि पनि आवश्यक सहयोग गर्दै आएको छ।   रासस