वर्डफ्लुका कारण उदयपुरमा १६ सय कुखुरा मरे

उदयपुर- वर्डफ्लु संक्रमणका कारण उदयपुरको ताप्ली गाउँपालिकामा १६ सय कुखुरा मरेका छन्। 

ताप्ली गाउँपालिका-३ इनामेका किसानले पालेको लोकल कुखुरा, परेवा, टर्की र जंगली पशुपन्छीमा वर्डफ्लु पुष्टि भएको हो।

स्थानीय होमबहादुर मगर, चक्रबहादुर मगर, बमबहादुर तामाङलगायतले पालेका कुखुरा धमाधम मर्न थालेपछि परीक्षण गर्दा बर्डफ्लु देखिएको भेटिनरी अस्पताल तथा पशु सेवा विज्ञ केन्द्र उदयपुरका प्रमुख डा. अजय साहले बताए।

उनका अनुसार रोगबाट १ हजार ६ सय २५ पन्छी मरेका छन्। कुखुरा मरेका जानकारी पाए लगत्तै बर्डफ्लुको आशंकामा स्थानीयको लिर्यस कुखुरा २० वटा, जंगली पन्छी ५ वटा र परेवा ३ वटा नमुना परीक्षणका लागि विराटनगर पठाइएको थियो।

विराटनगरको प्रारम्भिक परीक्षणपछि केन्द्रीय पशुपन्छी रोग अन्वेषण प्रयोगशाला त्रिपुरेश्वरमा गरिएको परीक्षणमा बर्डफ्लु पुष्टि भएको हो। भारतीय बजारबाट कटारी बजार हुँदै मार्केटिङका लागि लगिएका लिर्यस र बोइलर कुखुराबाट बर्डफ्लु भित्रिएको स्थानीयबासीको आशंका रहेको छ।

भारतीय बजारबाट कटारी बजार हुँदै मार्केटिङका १५ दिनअघि थारो लिर्यस र बोइलर कुखुरा बिक्रीका लागि लगिएको पाइएको साहको भनाइ छ।