घरका सबै सदस्यलाई बेहोस बनाएर दुई भारतीयले गरे लुटपाट

धनगढी- दुई दिन अगाडि कोठा भाडामा लिएर बस्दै आएका दुई भारतीयले कञ्चनपुरस्थित एक घरका सबै सदस्यहरुलाई बेहोस बनाएर लुटपाट गरेका छन्।

जिल्लाको भीमदत्त नगरपालिका–३, शुभप्रभात टोलका सन्तोश पाण्डेको परिवारका सबै सदस्यलाई बेहोस बनाएर शुक्रबार राति घरमा लुटपाट भएको प्रहरीले जनाएको छ ।

जिल्ला प्रहरी कार्यालय कञ्चनपुरका प्रहरी नायब उपरीक्षक चक्रबहादुर शाहका अनुसार घरमा दुई दिन अगाडि मात्र कोठा भाडा लिएर बस्दै आएका दुई जना भारतीय नागरिकले घरका सबै सदस्यहरुलाई बेहोस बनाएर लुटपाट गरेका हुन्।

प्रहरी नायब उपरीक्षक शाहले भने, ‘दुई दिनअघि मात्र उहाँको घरमा कोठा भाडा लिएर बस्‍ने गरेका दुई जना भारतीय नागकिरले शुक्रबार राति श्रीमतीको जन्मदिन परेको भन्दै मिठाइ र केक खुवाएका रहेछन्। मिठाइ र केकमा नसालु पदार्थ मिसाइएको रहेछ। खाएपछि सबै जना बेहोस् भएका रहेछन्। त्यसपछि लुटपाट भएको देखिन्छ।’

पाण्डे, उनकी श्रीमती कमला, छोरी सोना, छोरा सन्दिप र सुदिप बेहोस अवस्थामा घरमै भेटिएका प्रहरी नायब उपरीक्षक शाहले बताए। उनीहरुको महाकाली प्रादेशिक अस्पतालमा उपचार भइरहेको र अवस्था सामान्य रहेको शाहले बताए ।

‘लुटपाटमा संलग्‍न भारतीय नागरिकको पहिचान खुलेको छैन,’ उनले भने, ‘घरमा रहेको गरगहना, नगद, मोबाइल, कम्प्युटर लगायतका सरसामान चोरी भएको  पीडितले बताएका छन्।’ चोरीमा संलग्नहरुको खोजीकार्य भइरहेको उनले बताए।