नेप्सेमा चार वर्षयताकै कम कारोबारः परिसूचक र इन्डेक्समा गिरावट 

काठमाडौं- नेपाल स्टक एक्स्चेन्ज (नेप्से) मा यो वर्षकै कम कारोबार भएको छ । साताको चौथो दिन बुधबार १७ करोड ५३ लाख  ७७ हजार ६८७ रुपैयाँको मात्रै कारोबार भएको छ । १३९ कम्पनीको ४ लाख ७७ हजार ६८७ शेयरको खरिद बिक्रीबाट उक्त रकम बराबरको  कारोबार भएको हो । यो चार वर्ष यताकै सबैभन्दा कम कारोबार हो ।

नेपाल स्टक एक्सचेञ्जले एक विज्ञप्ति जारी गर्दै प्राविधिक समस्याका कारणले बुधबार नेप्सेको कारोबार स्थगित भएको जनाएको छ । प्राविधिक समस्या समाधान गरी कारोबार प्रसारणलार्इ सुचारु गरिएको पनि नेपाल स्टक एक्सचेञ्जले जनाएको छ । 



शेयर विश्लेषक धनकुमार राईले बुधबार यो वर्ष २०७५ सालमा अहिलेसम्मको कम शेयर कारोबार भएको बताए ।  ‘आज नेप्से बजार र क वर्गको सेन्सेटीभ इण्डेक्स दुवै घटेको छ,’ उनले भने ‘यस्तो अवस्था नेप्से बजारमा विरलै देखिन्छ ।’ यो अवस्था चार वर्षमा सबैभन्दा कम रहेको पनि रार्इले बताए । 

बजार घटे पनि शेयार बजार बढ्ने संकेत उनी देख्दछन् । राजनैतिक स्थिरता विभिन्न कम्पनीहरुमा पछिल्लो समय अर्थिक अवस्था समेत सुध्रिदै गएको कारणले आगामी दिनमा बजार बढ्ने उनको तर्क छ। 

नेप्से परिसूचक ५.५४ अंकले घटेर  १ हजार १९८.७७ विन्दुमा पुगेको  छ । ‘क’ बर्ग कम्पनीहरुको सेन्सेटिभ इण्डेक्स पनि  १.२४ प्रतिश घटेर २५२.३८ विन्दुमा पुगेको  छ ।

नेप्सेमा  आएका अधिकांश समूहको परिसूचक  रातो  भएका छन् । फाइनान्स र होटल समूहको बाहेक सबै समूहको  परिसूचक ओरालो लागेको हो। फाइनान्सको परिसूचक ०.७६ अंक बढेको छ होटलको स्थिर छ। 

सबैभन्दा बढी लाइफ इन्स्योरेन्सको परिसूचक ६७.६५ अंक घटेर ६ हजार ५७.६९ विन्दुमा पुगेको  छ । त्यसपछि नन लाईफ इन्स्योरेन्स समूहमा परिसूचक ६१.६१, माइक्रोफाइनान्सको परिसूचक १५.९२ अंक घटेको छ।

त्यस्तै सबैभन्दा कम अन्य समूहको परिसूचक १.३८ अंक घटेर ७११.४६ विन्दुमा पुगेको  छ ।