राष्ट्रियसभा निर्वाचन : प्रदेश १ मा ३ मत खसेन

विराटनगर– प्रदेश १ मा राष्ट्रियसभा सदस्य पदका तीन सिटका लागि बुधबार निर्वाचन सम्पन्न भएको छ। निर्वाचनमा तीन मत खसेन। स्थानीय तहको २ र एक प्रदेश सांसदको मत नखसेको  हो। 

स्थानीय तहतर्फ २७० र प्रदेश सभा सदस्यतर्फ ९१ मत खसेको प्रदेश निर्वाचन कार्यालयका प्रमुख लेवन काश्यप अधिकारीले बताए। बाली संरक्षण प्रयोगशाला र प्रदेश निर्वाचन कार्यालयमा आज भएको  मतदानमा झापाको गौरीगञ्ज गाउँपालिका प्रमुख बाबुराम श्रेष्ठ र विराटनगर महानगरपालिकाकी उपप्रमुख इन्दिरा कार्की अनुपस्थित भए। श्रेष्ठ छोरीको विवाह र कार्की स्वास्थ्य सम्बन्धी समस्याका कारण निर्वाचनमा मत खसाल्न आएनन्। सरकारी कागज किर्ते मुद्दामा फरार रहेकी एमाले सांसद गुलेफुन मिया पनि मत हाल्न आइनन्।  

प्रदेश १ मा तीन सिटका लागि मतदान भएको हो। तीन सिटका लागि सत्ता गठबन्धन, एमाले र राप्रपाका गरि ८ जना उम्मेदवार प्रतिष्पर्धामा छन्। अन्य, महिला र अपांगता वा अल्पसंख्यक गरी तीन सिटका लागि गठबन्धनका तर्फबाट अन्य समूहमा नेपाली कांग्रेसका गोपालकुमार बस्नेत, महिलामा नेकपा एकीकृत समाजवादीकी जयन्ती राई र अपाङ्गता वा अल्पसंख्यकमा जनता समाजवादी पार्टीका हेमराज राई, नेकपा एमालेबाट अन्यमा गुरु बराल, महिलामा सुमित्रा सुवेदी भण्डारी र अपांगता वा अल्पसंख्यकमा सोनाम गेल्जेन शेर्पा, राप्रपाबाट अन्यमा अम्बरबहादुर विष्ट र महिलामा रञ्जु प्याकुरेल प्रतिष्पर्धामा छन्। मतगणना आजै सुरु हुनेछ।