मोबाइल चोरी गर्ने दुई प्रहरी निलम्बित

धनगढी- कैलालीको धनगढीमा रहेको ग्लोबल मोबाइल ग्यालरीमा चोरी गर्ने दुई जना प्रहरी निलम्बनमा परेका छन्। जिल्ला प्रहरी कार्यालय कैलालीमा कार्यरत प्रहरी हवल्दार होमबहादुर माल र प्रहरी जवान भरतबहादुर बुढाललाई निलम्बन गरिएको हो।

जिल्ला प्रहरी कार्यालय कैलालीका प्रमुख प्रहरी उपरीक्षक विश्व अधिकारीका अनुसार उनीहरूविरुद्ध चोरी मुद्धा दर्ता भइर पाँच दिनको म्याद थप भएको छ। म्याद थप हुने वित्तिकै उनीहरू स्वतः निलम्बनमा परेका हुन्।

लागूऔषधको कारोबार भइरहेको सूचना पाएपछि मोबाइल ग्यालरीमा गएका माल र बुढालले चोरी गरेको भिडियो सार्वजनिक भएको थियो। घटनाबारे अनुसन्धान गर्न प्रहरीले उनीहरूलाईलाई हिरासतमा राखेर अनुसन्धान प्रक्रिया अगाडि बढाएको छ।

भिडियो सार्वजनिक हुनुअघि सोही मोबाइल ग्यालरीबाट धनगढी–५ का दोर्णबहादुर रावल, वडा नम्बर २ बस्ने वर्ष २९ का टेक बिष्ट र वडा नम्बर ४ का ३० वर्षीय मनिष भण्डारीलाई प्रहरीले पक्राउ गरेको थियो। उनीहरूको साथबाट १ ग्राम ५५० मिलिग्राम खैरो हिरोइन फेला परेको  थियो।