कैलारीमा माघीको तीन दिन बिदा

काठमाडौं– कैलालीको कैलारी गाउँपालिकाले माघी पर्वकोअवसरमा तीन दिन बिदा दिने निर्णय गरेको छ। गाउँ कार्यपालिकाको बैठकले थारु बाहुल उक्त पालिकामा पुस ३०, माघ १ र २ गते बिदा दिने निर्णय गरेको हो।

तीन दिन सरकारी कार्यालय, विद्यालय, सार्वजनिक संस्थान, बैंक तथा वित्तीय संस्था बन्द रहनेछन्। थारू समुदायले नयाँ वर्षका रूपमा मनाउने सबैभन्दा ठूलो पर्व हो माघी। कैलारी गाउँपालिकामा ९५ प्रतिशत थारू जातिको बसोबास छ।

अघिल्लो वर्ष पनि सो गाउँपालिकाले माघको अवसरमा तीन दिन सार्वजनिक बिदा दिएको थियो। पर्व नजिकिएसँगै थारू बस्तीमा माघीको चहलपहल सुरू भइसकेको छ।