क्रिकेट संघ रूपन्देही अध्यक्षमा उम्मेदवारी दिने शक्ति गौचनको घोषणा

काठमाडौं- नेपाली राष्ट्रिय टिमका पूर्व स्पिनर शक्ति गौचनले रूपन्देही जिल्ला क्रिकेट संघको अध्यक्षमा उम्मेदवारी दिने घोषणा गरेका छन्।

रूपेन्देहीमा स्टार क्रिकेट एकेडेमी सञ्चालन गरिरहेका गौचनले माघ ५ गते हुने जिल्ला क्रिकेट संघको अधिवेसनमा उम्मेदवारी दिने घोषणा गरेका हुन्। गौचनले सामाजिक सञ्जालमार्फत उम्मेदवारी घोषणा गरेका छन्।

‘क्रिकेट खेल र खेलाडीको निमित्त, क्रिकेटको विकासका निमित्त, नयाँ सोच लिएर लिएर रूपन्देही जिल्लालाई देशकै उत्कृष्ट जिल्ला बनाउने उद्देश्यका यसपटक जिल्ला क्रिकेट संघको चुनावमा अध्यक्ष पदका लागि उम्मेदवारी दर्ता गर्न गइरहेको छु। सम्बन्धित व्यक्ति र पदाधिकारीबाट सहयोग र शुभेच्छाको आसा गरेको छु,’ उनले लेखेका छन्। 

नेपाल क्रिकेट संघ (क्यान) ले चार वर्षे कार्यकाल सकिएका जिल्लाहरूमा निर्वाचन गर्ने निर्णय गरेसँगै जिल्लाहरूमा अधिवेसन हुन लागेको हो।