बंगलादेशमा सम्पन्न कराँतेमा नेपाललाई ४ स्वर्ण

काठमाडौं- बंगलादेशमा सम्पन्न बि-जी कराते च्याम्पियनसिप २०२१ मा नेपालले ४ स्वर्ण पदक हात पार्न सफल भएको छ। मुजिबको सयौं जन्मोत्सवको अवसरमा बंगलादेश गोजुरियो कराते महासंघको सहयोग तथा बंगालदेश बसप संघको आयोजनामा भएको प्रतियोगितामा नेपाल सितेरियो करातेले चार स्वर्ण पदक प्राप्त गरेको हो।

डिजेन डोल्मा लामाले दुई वटा स्वर्ण प्राप्त गरेकी छन्। लामाले कुमिते र कातामा स्वर्ण प्राप्त गरेकी हुन्। यस्तै पासाङ्ग तामाङ्गले ७० केजी तौलको कातामा स्वर्ण हात पारेको टिम व्यवस्थापक रामकुमार श्रेष्ठले जानकारी गराए।

श्रेष्ठका अनुसार स्वर्ण प्राप्त गर्नेमा ग्याल्मो सोमिका लामा पनि छिन्। उनले ३५ केजी तौलको कुमिते तर्फ स्वर्ण प्राप्त गरेकी हुन्।

यस्तै गरी नेपाली टोलीले २ रजत र ५ कास्य पदक पनि जोडेको छ। पासाङ्ग ७० केजी  र राजदेव बमजन ६५ केजी रहेका छन्। दुवैले कुमितेतर्फ रजत प्राप्त गरेका हुन्।

यसैगरी कास्य पदक प्राप्त गर्नेमा रवीन्द्र कुँवरले खुल्ला तर्फ, युरोडिस रोक्का ६० केजी, उमेश भण्डारी ५५ केजी, रविना ४५ केजी तथा उमङ्ग बुढाथोकी १४ बर्ष मुनि उमेर समूह रहेका छन्।

च्याम्पियनसिपमा छत्रबहादुर आले मगर, रामचन्द्र गुरुङ्ग, नारायण श्रेष्ठ, प्रकाश तामाङ्ग लामा, मिङ्गमा तामाङ्ग र गणेशलाल श्रेष्ठले निर्णायकको भूमिका निर्वाह गरेका थिए।