प्रदेश १ मा राष्ट्रिय सभाका उम्मेदवारको मनोनयन दर्ता

विराटनगर- आगामी माघ १२ गते हुने राष्ट्रिय सभा सदस्यको निर्वाचनका लागि प्रदेश १ मा गठबन्धन दल र नेकपा एमालेले मनोनयन दर्ता गराएका छन्।

राष्ट्रिय सभाको अन्यतर्फ गठबन्धनकातर्फबाट नेपाली कांग्रेसका गोपाल बस्‍नेत (झापा) र एमालेका गुरु बराल (मोरङ), महिलामा गठबन्धनबाट नेकपा एकीकृत समाजवादीकी जयन्ती राई (भोजपुर) र एमालेबाट सुमित्रा भण्डारी (झापा) , अल्पसंख्यकमा गठबन्धनबाट जनता समाजवादी पार्टीका हेमराज राई थुलुङ (भोजपुर) र एमालेबाट सोनाम ग्याल्जेन शेर्पा (सोलु) ले उम्मेदवारी दर्ता गरेको निर्वाचन अधिकृतको कार्यालयले जनाएको छ।

कार्यालयका अनुसार राष्ट्रिय सभा सदस्यका लागि मंगलबार दिउँसो ३ बजे सम्म मनोनयन दर्ताको समय निर्धारण गरिएको छ। 

प्रदेश १ बाट फागुन २० गते ३ सदस्यको पद खाली हुँदैछ। यसअघि तीन वटै सदस्य एमालेबाट निर्वाचित भएका थियो। 

एमालेका पर्शुराम मेघी गुरूङ, अगमसिंह वान्तवा र नैनकला ओझा निर्वाचित भएका थिए। राष्ट्रिय सभाको निर्वाचनका लागि प्रदेश सभाका ९२ र स्थानीय तहका २७२ मतदाता रहेका छन्।

त्यसैगरि राप्रपाबाट अन्यमा अम्बरबहादुर विष्ट र महिलामा रन्जु प्याकुरेलले मनोनयन दर्ता गरेका छन्। प्रदेश १ मा राप्रपाको मतभार १२० छ।