'हिउँमा फसेकाले ओढारबाट फोन गर्छन्, हेलिकोप्टर लिएर दुईपटक जाँदा पनि उद्धार गर्न सकिएन'

ताप्लेजुङ- ४ दिनदेखि हिउँमा फसेका ताप्लेजुङको मिक्वाखोला गाउँपालिका–५ स्थित पापुङका बाबुछोराको अझै उद्धार हुन सकेको छैन। उद्धारका लागि शनिबार गएको हेलिकोप्टर उनीहरू रहेको स्थान पत्ता नलागेपछि उद्धार नगरी फर्किएको छ।

हिउँमा फसेको क्षेत्रमा दुई पटकसम्म हेलिकोप्टर गएको थियो। पहिलोपटक पुग्दा ठाउँ पत्ता नलागेको र दोस्रोपटक स्थानीयवासीलाई लिएर जाँदा मौसममा खराबी आएकाले उद्धार गर्न नसकिएको पापुङका वडाध्यक्ष डण्डु शेर्पाले बताए।

उद्धारका लागि आइतबार पुनः हेलिकोप्टर लैजाने तयारी भएको शेर्पाको भनाइ छ। 'हामी दुई पटकसम्म सो क्षेत्रमा पुग्यौँ, पहिलोपटक ठाउँ पत्ता लागेन, दोस्रोपटक जाँदा कुहिरो लाग्यो, अब भोलि पुनः जान्छौँ,' शेर्पाले भने। हिउँमा फसेकाहरू बेलाबेलामा फोन सम्पर्कमै आउने गरेका शेर्पाको भनाइ छ।

ताप्लेजुङ मिक्वाखोला घर भएका अन्दाजी ५५ वर्षका लाक्पाटासी शेर्पा र उनका छोरा १५ वर्षीय पासाङ शेर्पा चार दिनदेखि हिउँमा फसेका छन्। चौँरीगोठ सार्ने क्रममा उनीहरू हिमपहिरोमा परेका थिए। फोन सम्पर्कका क्रममा उनीहरूले आफूहरू एउटा ओढारमा आड लिएर बसेको बताउने गरेको वडाध्यक्ष शेर्पाको भनाइ छ।